ەڭبەك كوشى-قونىنا تالاپتى كۇشەيتىپ، ەتنيكالىق كوشى-قوندى جەڭىلدەتۋگە ءتيىسپىز - م. باقتيار ۇلى

استانا. قازاقپارات - ەڭبەك كوشى-قونىنا تالاپتى كۇشەيتىپ، ەتنيكالىق كوشى-قوندى جەڭىلدەتۋگە ءتيىسپىز. بۇگىن پارلامەنت سەناتىنىڭ جالپى وتىرىسىندا ۇكىمەت باسشىسىنىڭ اتىنا ساۋال جولداعان سەناتور مۇرات باقتيار ۇلى مالىمدەدى.

«سوڭعى جىلدارى ەلگە ورالىپ جاتقان ورالمانداردىڭ ازاماتتىق الۋداعى جانە ەلىمىزدە تۇراقتى تۇرۋداعى قۇقىقتىق، اكىمشىلىك كەدەرگىلەرى كوبەيىپ كەتتى. اتاپ ايتقاندا، مۇنداي كەدەرگىلەر ەل ۇكىمەتىنىڭ 2012-جىلعى 362№ قاۋلىسىمەن، 2014-جىلدىڭ 111№ قاۋلىسىنىڭ نەگىزىندە جۇزەگە اسىپ كەلەدى. بۇل ولاردىڭ اتامەكەنىنە قونىستانۋىن قيىنداتىپ وتىر. بۇل رەتتە قانداستارىمىزدان ونىڭ ازاماتتىعى، مەملەكەتتىڭ جازباشا كەلىسىمى رەتىندە بولۋى مۇمكىن كەتۋ پاراعى، شەتەلگە تۇراقتى تۇرۋ ءۇشىن رۇقساتتى راستايتىن باسقا قۇجاتتار مەن كەلگەن ەلىندە سوتتىلىعىنىڭ بار، نە جوقتىعىن راستايتىن قۇجاتتار تالاپ ەتىلە باستاعان. ال كەلگەن ەلىنەن اكەلىنگەن قۇجاتتارعا سول ەلدىڭ وسىنداعى ديپلوماتيالىق وكىلدەرى ءمور باسىپ، ماقۇلدايتىنى تاعى بار»، - دەيدى مۇرات باقتيار ۇلى.

ونىڭ سوزىنە قاراعاندا، ونداي ەكى ءتۇرلى قۇجاتتى اكەلۋ قاراپايىم ورالماندار ءۇشىن قۇقىقتىق تۇرعىدان مۇمكىن بولعانىمەن، ءىس جۇزىندە مۇلدەم قيىن.

«ارينە، ۇكىمەتتىڭ اتالعان قاۋلىلارى ەلىمىزگە سىرتتان كەلەتىن كەلىمسەكتەردىڭ كوشى-قونى اعىنىنان تۋىندايتىن قاۋىپ-قاتەردىڭ الدىن الۋ ماقساتىندا قابىلدانعانىن تۇسىنۋگە بولاتىنداي. ءبىراق، بۇدان بۇرىن مۇنداي تالاپتار ەتنيكالىق قازاقتارعا قاتىسى جوق ەدى، بۇعان دەيىنگى ۇكىمەت قاۋلىلارىنىڭ باسىم بولىگىندە ماسەلە شەتەلدەگى قازاقتارعا قاتىستى بولعان جاعدايدا ەتنيكالىق قازاق وكىلدەرىنەن وزگە دەگەن تىركەس ارنايى قوسىلاتىن. وكىنىشكە قاراي، سوڭعى بىرنەشە جىلدىڭ كولەمىندە شەتەلدەگى قازاقتار مۇددەسى كوبىنەسە ۇمىت قالىپ، ولاردىڭ قۇقىقتىق دارەجەسى وزگە شەتەلدىكتەردىڭ دارەجەسىنە دەيىن قۇلدىراپ كەتتى»، - دەيدى مۇرات باقتيار ۇلى.

وسىعان وراي، سەناتور شەتەلدەگى قانداستارىمىزدىڭ قازاقستانعا كەلىپ تۇراقتى تۇرۋىنا كەدەرگى بولماسى ءۇشىن، ۇكىمەت قاۋلىسىنا «ەتنيكالىق قازاقتاردان وزگە» دەگەن ءبىر اۋىز ءسوز تىركەسىن قوسۋدى سۇرايدى. «كوپتەگەن ەلدەردە ەڭبەك كوشى-قونى مەن ەتنيكالىق كوشى-قونعا ەكى ءتۇرلى كوزقاراس بولاتىنىن ايتادى. ماسەلەن، ءبىراز ەلدە ەڭبەك كوشى-قونىنىڭ تالابى بارىنشا قاتايعان بولسا، كەرىسىنشە ەتنيكالىق كوشى-قونعا بارىنشا جەڭىلدىكتەر جاسالادى. بىزگە دە كەرەگى وسى»، - دەيدى سەناتور.

اۆتور: قانات مامەتقازى ۇلى