حالىقارالىق فورۋمدار وتكىزۋگە قۇشتارلانا بەرۋگە بولمايدى - ق. توقايەۆ

استانا. قازاقپارات - بۇگىن پارلامەنت سەناتىنىڭ جالپى وتىرىسىندا پالاتا ءتوراعاسى قاسىم-جومارت توقايەۆ ەلىمىزدە حالىقارالىق فورۋمدار وتكىزۋدىڭ جيىلەپ كەتكەنىن ايتىپ، ۇكىمەتكە قۇلاققاعىس جاسادى.

ەسكە سالا كەتەيىك، وتىرىستا «قازاقستان رەسپۋبليكاسىنىڭ ۇكىمەتى مەن بىرىككەن ۇلتتار ۇيىمى اراسىنداعى تەحنيكالىق ىنتىماقتاستىقتىڭ نىسانالى قورى تۋرالى كەلىسىمدى راتيفيكاتسيالاۋ تۋرالى» ق ر زاڭى قابىلدانعان بولاتىن. ال اتالعان قۇجاتتا كوزدەلگەن باستى ماقسات 2014-جىلعى 6-8- قازاندا استانادا «بىرىككەن ۇلتتار ۇيىمىنىڭ «ەلەكتروندىق ۇكىمەت 2014» جاھاندىق فورۋمىن» وتكىزۋ بولىپ تابىلادى.

«ارينە، مەن بۇل كەلىسىمدى راتيفيكاتسيالاۋدىڭ قاجەتتىلىگىنە ەش كۇمان كەلتىرمەيمىن. الايدا، بىزدە سوڭعى ۋاقىتتا حالىقارالىق فورۋمدار كوبەيىپ كەتتى. بۇل جايىندا پرەزيدەنت تە بىرنەشە مارتە ايتتى. قازىر ءبىز راتيفيكاتسيالاپ جاتىرمىز، ال بيۋجەتتەن بىردەن بەس ءجۇز مىڭ دوللار وسىعان كەتەدى. بۇل سونشالىقتى كوپ سوما ەمەستەي كورىنەدى، دەگەنمەن فورۋمدار بىرىنەن سوڭ ءبىرى قاپتادى»، دەدى سەنات سپيكەرى.

وسى رەتتە ءتوراعا قاسىم-جومارت توقايەۆ ب ۇ ۇ-مەن ىنتىماقتاستىق شىن مانىندە قاجەتتى ەكەنىن ايتىپ، الايدا، ونداي ۇيىمدا شەشىمدەردىڭ قالاي قابىلداناتىنىنا ناقتى تانىس ەكەنىن العا تارتتى.

«ولار (ب ۇ ۇ- اۆت.) ءتۇرلى ەلدەردە، سونىڭ ىشىندە دامىپ كەلە جاتقان جانە شاپشاڭ دامىپ كەلە جاتقان ەلدەردە فورۋمدار مەيلىنشە كوپ وتكەنىن قالايدى. سوسىن ولاردىڭ بۇل ماسەلە بويىنشا ءوز ەسەپ بەرۋلەرى بار. سوندىقتان دا، مەن ناقتى بۇگىن قارالىپ وتىرعان فورۋم جايىندا ەمەس جالپىلاما ايتىپ وتىرمىن. ءبىز كەشە عانا G-global مەن ەكونوميكالىق فورۋمدى اياقتاعان سەكىلدى ەدىك. ەندى تاعىسى كەزەكتە تۇر»، - دەدى سەنات ءتوراعاسى.

بۇدان بولەك، سەنات سپيكەرى جالپى حالىقارالىق فورۋمداردى وتكىزۋگە تاڭداۋمەن قاراپ، ەلىمىزگە تيىمدىسىنە باسىمدىق بەرۋ كەرەكتىگىن جەتكىزدى. بۇل رەتتە ەڭ الدىمەن ەلىمىزدەگى بيۋجەتتىڭ قاراجاتىن ۇنەمدەۋ ماڭىزدى.

«ەكىنشىدەن، مەن ب ۇ ۇ-نىڭ وزىندە جاعداي قانداي ەكەنىن وتە جاقسى بىلەمىن، ونىڭ ىشىندە قىزمەت ەتتىم. رەيتينگتەردىڭ قالاي جاسالاتىنىنا، قاعازدى ۇنەمدەۋ، قاعازباستىلىقتان ارىلۋ جايىنا قانىقپىن. ب ۇ ۇ وزدەرى وسىمەن كۇرەسىپ، «ەلەكتروندىق ۇكىمەتتى» ءوز ىشىندە دە ەنگىزۋگە تىرىستى. دەگەنمەن، وندا ءبارى تابىستى ءوتتى دەپ ايتا الماس ەدىم. ماسەلەن، ب ۇ ۇ جەنيەۆا بولىمشەسىندە ءبىز قاعاز اينالىمىن وتىز بەس پايىزعا ازايتا الدىق. بۇنى ودان دا ازايتۋعا بولاتىن ەدى. ايتا كەتەرلىگى، قاعازباستىلىق جۇمىستى شابانداتادى، ول - ب ۇ ۇ عانا ەمەس، قازاقستاننىڭ دا، باسقا دا مەملەكەتتەر ورگاندارىنىڭ دا جۇمىسىنا كەدەرگى. سوندىقتان دا، فورۋمنىڭ وزەكتىلىگى داۋ تۋعىزبايدى، الايدا ونىڭ تيىمدىلىگىنە، بىزگە بەرەر پايداسىنا قاراۋ كەرەك»، - دەدى سپيكەر.

اۆتور: قانات مامەتقازى ۇلى