بىشكەكتە قىتاي ازاماتتارى ءتارتىپ ساقشىسىن سوققىعا جىققان

استانا. قازاقپارات - بىشكەكتە قىتاي ازاماتتارى جەرگىلىكتى ميليتسيا قىزمەتكەرىن سوققىعا جىققان دەپ حابارلايدى «ۆەچەرنيي بيشكەك» پورتالى.

شەتەلدىكتەر ءتارتىپ ساقشىسىمەن بىرگە اراشا تۇسپەك بولعان ادامدى دا ۇرىپ تاستاعان.

وقيعا كەشە لەنين اۋدانىنداعى قۇرىلىس الاڭىندا ورىن العان. ۋچەسكەلىك ميليتسيا نىسانعا بۇعان دەيىن ورىن العان قىلمىستى تەكسەرۋگە كەلگەن ەكەن.

قاقپاعا جاقىنداعان ساتتە ىشتەن سپيرتتىك ىشىمدىك ءىشىپ العان قىتاي ازاماتى شىعىپ، ءتارتىپ ساقشىسىنىڭ اياعىنا دارەت سىندىرىپتى.

ميليتسيا قىزمەتكەرى ونى توقتاتپاق بولعان ساتتە ىشتەن وزگەلەرى شىعىپ، زاڭ وكىلىن سوققىعا جىققان.

جابىرلەنۋشى قاشىپ قۇتىلۋ ءۇشىن جاقىن ماڭداعى ءدامحانالارعا قاراي جۇگىرگەن كورىنەدى. الايدا، قىتايلىقتار ونى قۋىپ جەتىپ، تاعى دا ۇرعان. ءدامحانادا تاماقتانىپ وتىرعان ازامات ارا تۇسپەك بولىپ شىققاندا قۇرىلىسشىلار ونى دا تاياق استىنا الىپتى.

وقيعا ورنىنا جەتكەن قۇقىق قورعاۋشىلار بۇزاقىلاردىڭ بارلىعىن ۇستاپ، قاماپ تاستادى. قىتايلىقتاردىڭ ەل اۋماعىنا قانشالىقتى زاڭدى كىرگەندىگى تەكسەرىلۋدە.

Baq.kz