تۇركى ادەبيەتى مەن مادەنيەتىن دامىتۋعا باعىتتالعان اكادەميانى قۇرۋعا قاتىستى قۇجات ماقۇلداندى
اتالعان كەلىسىمگە سايكەس، تاراپتار تۇركى تىلدەس مەملەكەتتەردىڭ ىنتىماقتاستىق كەڭەسىنىڭ اياسىندا حالىقارالىق ۇيىم نىسانىنداعى تۇركى اكادەمياسىن قۇرادى. ال تۇركى اكادەمياسىنىڭ نەگىزگى ماقساتتارى مەن مىندەتتەرى تۇركى تىلدەرىنىڭ، ادەبيەتى مەن مادەنيەتىنىڭ دياحروندىق زەرتتەۋلەرىن ساقتاۋعا، دامىتۋعا جانە كەڭىنەن پايدالانۋعا باعىتتالعان تۇركولوگيا سالاسىنداعى زەرتتەۋلەردى ۇيلەستىرۋ جانە وعان جاردەمدەسۋ بولىپ تابىلادى. كەلىسىمنىڭ شارتتارىنا سايكەس، وعان قاتىسۋشى تاراپتار مىندەتتى جارنالار تولەيتىن بولادى. ولاردىڭ مولشەرى تۇركى سىرتقى ىستەر مينيسترلەرىنىڭ كەڭەسى قول قويعان جەكەلەگەن حاتتامادا ايقىندالادى.
بۇدان بولەك، حالىقارالىق اكادەميا تۇركى حالىقتارىنىڭ مادەني جانە رۋحاني مۇراسىنا، ولاردىڭ الەمدىك وركەنيەتتى دامىتۋعا قوساتىن ۇلەسىنە زەرتتەۋلەر جۇرگىزۋدى، ورتاق كونە ماتىندەر مەن اۋىزەكى دەرەككوزدەردى قوسا العاندا، تۇركى تىلدەرىنىڭ بۇكىل الەۋەتىن پايدالانىپ، بارشا تۇركى حالىقتارى ءۇشىن ورتاق ادەبي ءتىل جاساۋعا ۇمتىلۋدى، بارشا تۇركى تىلدەرى ءۇشىن قولدانىلاتىن جيناقتالعان ءالىپبي ازىرلەۋ ماسەلەلەرىن قاراستىراتىن بولادى.
ەسكە سالا كەتەيىك، تۇركى اكادەمياسى عىلىمي-زەرتتەۋ ورتالىعى استانادا 2010-جىلى قازاقستان مەن تۇركيا رەسپۋبليكالارىنىڭ مەملەكەت باسشىلارىنىڭ قاتىسۋىمەن اشىلدى. 2012-جىلى بىشكەك قالاسىندا وتكەن تۇركى تىلدەس مەملەكەتتەر كەڭەسىنىڭ ەكىنشى سامميتىندە تۇركى اكادەمياسىن حالىقارالىق ۇيىم رەتىندە قۇرۋ تۋرالى كەلىسىمگە قول قويىلعان بولاتىن. ال بۇگىنگى تاڭدا اتالعان كەلىسىمدى ازەربايجان، قىرعىزستان مەن تۇركيا رەسپۋبليكالارى راتيفيكاتسيالاعان.
اۆتور: قانات مامەتقازى ۇلى
