قاشاعانداعى مۇناي ءوندىرىسىن جاڭعىرتۋعا كەتەتىن شىعىن كىمنىڭ مويىنىنا ارتىلادى؟

اتىراۋ. قازاقپارات - قاشاعان كەن ورنىنداعى مۇناي ءوندىرىسىن جاڭعىرتۋعا كەتكەن شىعىن مەردىگەرگە ارتىلادى، دەپ حابارلادى ق ر ەنەرگەتيكا ءمينيسترىنىڭ ءبىرىنشى ورىنباسارى ۇزاقباي قارابالين.

«ءوندىرىستى جاڭعىرتۋعا كەتكەن بارلىق شىعىن، ونىڭ ىشىندە 200 كيلومەترلىك ەكى قۇبىردىڭ اۋىستىرىلۋىن دا مەردىگەر ءوز موينىنا الۋى ءتيىس. بۇل شارا مۇنايدى كوممەرتسيالىق ءوندىرۋ ءۇردىسىن بۇزعانعا قاتىستى قاشاعان بويىنشا ونىمدەردى ءبولىسۋ تۋرالى كەلىسىمدە قاراستىرىلعان سانكسياعا سايكەس قولدانىلادى. ەگەر 2013-جىلدىڭ 1- قازانىنا دەيىن مەردىگەر كوممەرتسيالىق ءوندىرىستى قامتاماسىز ەتىپ ۇلگەرمەسە، ارى قاراي جۇمىس شىعىنىنىڭ ورنى تولتىرىلمايدى. سوندىقتان قازىر جۇرگىزىلىپ جاتقان جۇمىستارعا تولەنبەيدى»، - دەدى ۇ. قارابالين.

ەسكە سالا كەتەيىك، اتىراۋ وبلىسى قاشاعان كەن ورنىندا 2013-جىلى كۇزدە باستالعان مۇناي ءوندىرىسى ۋاقىتشا توقتاتىلعان. بۇعان قۇبىرلاردىڭ توزۋى سەبەپ بولعان. الدىن الا بولجام بويىنشا، ءوندىرۋ ءىسى 2016-جىلى جاڭعىرتىلادى.