ميىڭىزدى شىنىقتىرعىڭىز كەلە مە؟
منەموتەحنيكا نەمەسە منەمونيكا جاتتالۋى كەرەك اقپاراتتىڭ ورنىن ويشا رەتتەۋ، جانە اسسوتسياتسيا ارقىلى ولاردى ءبىر-بىرىمەن جالعاۋ. اقپاراتتاردى ورنالاستىرۋ مەن ولاردى بايلانىستىرۋ ءۇشىن ادامنىڭ ويلانۋ (ايرىقشا ويلانۋ)، قيالداۋ، نازار سالۋ قابىلەتتەرى قولدانىلادى.
منەموتەحنيكانىڭ قۇندى قاسيەتتەرىنىڭ ءبىرى ونىمەن تانىسقاننان كەيىن ونى بىردەن قولدانىپ كەتە بەرسەڭىز بولادى.
ونىڭ نەگىزگى ءىلىمىن ۇيرەنسەڭىز قاتتى ۇزىن ەمەس ساندار نەمەسە سوزدەر تىزبەگىن جاتتاي الۋ قابىلەتىنە يە بولاسىز. الايدا، بۇل قابىلەت كەيدە جاڭا باستاپ كەلە جاتقاندارعا كەسىرىن تيگىزىپ جاتادى.
منەموتەحنيكانىڭ تەك باستاپقى قادامدارىن يگەرسە دە، ونىڭ بارلىق ەگجەي-تەگجەيلەرىن ۇيرەنگەن ادامداي سەزىنەدى. الايدا، قابىلەتتەرىنىڭ ەڭ كەرەكتى شاقتارىندا قولدانا الماي قالادى. سەبەبى، جاڭادان باستاپ كەلە جاتقان كوپ ادامعا منەموتەحنيكانىڭ قولدانىس تاجىريبەسى جەتىسپەيدى. اسسوتسيالاۋ ادىستەرىن بىلەتىن سياقتى، ءبىراق اقپاراتتاردى جاتتاي المايدى. ونداي جاعدايلار بولماس ءۇشىن جاتتاۋ تاسىلدەرىن قولدانۋدى تۇراقتى تۇردە جاتتىقتىرىپ، ادەت دارەجەسىنە دەيىن جەتكىزۋ كەرەك.
منەموتەحنيكا نەنى جاساي المايدى؟
بۇل جۇيەنىڭ پارادوكس تۋعىزاتىن جەرى، منەموتەحنيكا - اقپاراتتى جاتتاۋعا كومەكتەسەتىن جۇيە، ءبىراق ول ادام جادىنىڭ جۇمىسىن جاقسارتا المايدى. ارينە، اقپاراتتى قابىلداۋ جانە منەموتەحنيكانى قولدانۋ كەزىندە ادام جادى جۇمىس ىستەيدى سوندىقتان از-ماز جاقسارادى. ءبىراق ايتىپ كەتكەنىمىزدەي، منەموتەحنيكا تەك ادامنىڭ قيالداۋ، نازار اۋدارۋ، ويلاۋ قابىلەتتەرىن قولدانادى.
سول سەبەپتى، منەموتەحنيكامەن اينالىسۋدى باستاعاننان كەيىن قىسقا ۋاقىت ىشىندە زاتتاردى بايقاعىشتىق، اينالىسىپ جاتقان جۇمىسىڭىزعا زەيىن قويۋ سياقتى قاسيەتتەرىڭىز كۇشەيىپ، ءبىراق جادىڭىزدىڭ اسا جاقسارماعانىن سەزسەڭىز، تاڭقالماڭىز.
ادام جادىنىڭ ايرىقشالىقتارى
ادام نەگىزىنەن وزىنە بايلانىستى جانە وزىندە بار اقپاراتقا بايلانىستى زاتتاردى تەزىرەك جاتتايدى. سول ءۇشىن، ءارتۇرلى فاكتىلەردى ءبىر جەرگە جيناپ، بايلانىستىرۋ قاجەت. ول بايلانىستار ءارتۇرلى بولۋى مۇمكىن، ەڭ باستىسى ولار سول ادامعا قاتىستى بولۋى كەرەك. مۇمكىن ول كۇلكىلى وقيعا بولار، انەكدوت، ءتىپتى ەشقاشان ورىندالمايتىن ويدان شىعارىلعان قيال بولۋى مۇمكىن. ەڭ باستىسى - بۇل بايلانىستار جاتتاۋشى ادام ءۇشىن جالپى فوننان ەرەكشەلەنىپ تۇرۋى، بىرەگەي بولۋى ءتيىس.
اسسوتسياتسيالاۋ ءادىسى
جاتتاۋدىڭ ءبىر ءتۇرى بولىپ اسسوتسياتسيالاۋ ءادىسى ەسەپتەلەدى. كەيدە بۇل ءادىستى اسسوتسياتسيالار تىزبەگىنىڭ ءادىسى، اسسوتسياتسيالار بايلانىسىنىڭ ءادىسى نەمەسە جاتتاۋدىڭ تىزبەكتى ءادىسى دەپ تە اتايدى. بۇل ءادىس كوبىنە سوزدەر، ساندار جانە داتالار تىزبەگىن جاتتاۋ ءۇشىن قولدانىلادى. منەموتەحنيكا ءادىسىن قولدانا ءبىلۋ ورىندار ءادىسى سياقتى باسقا دا ادىستەردى قولدانۋ ءبىلۋ قابىلەتىن تۋدىرادى.
اسسوتسياتسيالاردى قالاي قۇرامىز؟
ەگەر زاتتاردىڭ اراسىندا بايلانىس بولماسا، ونى ويلاپ تابۋ كەرەك. ول بايلانىس كەز كەلگەن تۇردە بولۋى مۇمكىن: ەرتەگىلىك، فانتاستيكالىق، ابسۋردتىك نەمەسە كۇلكىلى. بايلانىسىڭىز نەعۇرلىم ەرەكشە بولسا، ول زاتتاردى تەزىرەك جاتتايسىز.
مىسال: شاتىر- اتتى اسكەر - ەسىڭىزگە اتتى اسكەردى الىڭىز، ولار ءۇيدىڭ شاتىرىندا شابۋىلعا شىعۋ دابىلىن كۇتىپ وتىر دەلىك. دابىل سوعىلادى، ادامدار ءۇيدىڭ شاتىرىنداعى كىشكەنە تەرەزەدەن سىعىلىسىپ سىرتقا شىعىپ جاتىر. ودان كەيىن جىلقىلار مىسىق ىسپەتتەس سەكىرەتىن جەرىنە مۇقيات قاراپ الىپ، سەكىرىپ جاتىر. اتتى اسكەر ورىندارىنان تۇرىپ، ۇرانداتىپ شابۋىلعا جونەلەدى.
شىنى- ەشكىلەر - ەكى تەكە ءبىر-بىرىنە قاراما-قارسى قۇيىنداي ۇشىپ كەلەدى. ارالارىندا كىشكەنە عانا قاشىقتىق قالعاندا ءبىر-ءبىرىن زاقىمداپ الماس ءۇشىن ءبىر مەيىرىمدى ادام ەكەۋىنىڭ اراسىنا شىنى قويىپ قويادى. ەكى تەكە باستارىن شىنىعا ۇرىپ، ەكى جاققا قۇلايدى. نە بولعانىن تۇسىنبەي، ەكەۋى كەرى بۇرىلىپ كەتىپ قالادى.
وسىنداي پرينتسيپپەن جۇمىس ىستەي بەرسەڭىز كەز كەلگەن زاتتى بايلانىستىرا بەرۋگە بولادى. اسسوتسيتسياڭىز نەعۇرلىم ەرەكشە بولسا، سوعۇرلىم وزىڭىزگە جاتتاۋ وڭايراق بولادى.
اسسوتسياتسيا ءادىسى ارقىلى جادىڭىزدى جاتتىقتىرۋ ءۇشىن ءسوز جاتتاۋ تاپسىرمالارىن ورىنداۋ قاجەت. ءسىزدىڭ ويىڭىزشا بۇل جاتتىعۋدىڭ ەشقانداي ءمانىسى دە، پايداسى دا بولماۋى مۇمكىن. «قايداعى جوق سوزدەردى جاتتاۋ ماعان نە بەرەدى؟» - دەپ ويلاۋىڭىز مۇمكىن.
الايدا، بۇل ءادىستى يگەرىپ العاننان كەيىن دۇكەننەن ساتىپ العان زاتتارىڭىزدىن اتىن، ءبىر كۇندە جاسالۋى ءتيىس جۇمىستاردىڭ ءتىزىمىن، سيتاتالاردى، رەتسەپتتەردى ەش قيىندىقسىز جاتتاي الاسىز.
«El.kz»
