اڭنان ايلاسىن اسىرعاندار سايىسقا ءتۇستى

استانا. قازاقپارات - بەلارۋستىڭ مينسك قالاسىندا بۇعىلارعا قاتىسى بار قىزىقتى سايىس ءوتىپ تۇرادى. ەلدىڭ ءار تۇكپىرىنەن جيىلعان تالاپكەرلەر وسىناۋ سۇيكىمدى جانۋارلاردى الداپ شاقىراتىن داۋىستى اينىتپاي كەلتىرۋدەن سىنعا تۇسەدى.

 قارسىلاسىنان باسىم تۇسكەن ساتتەگى ماساتتانۋىن بۇعىلار موڭىرەۋى ارقىلى بىلدىرەدى. ونىسى ورماننىڭ ەندىگى قوجاسى مەنمىن دەگەندى ەسكەرتكەنى ەكەن.

سايىسقا قاتىسۋشىلاردىڭ بارلىعى -  بۇل سالادا مول تاجىريبە جيناعان كاسىبي اڭشىلار. سوندىقتان ءبارى دە سىمباتتى جانۋاردىڭ داۋىسىن اينىتپاي قايتالاپ، ونىڭ اڭشىلىق كەزىندە تاپتىرماس ءتاسىل ەكەندىگىمەن ءبولىستى.

جارىسقا قاتىسۋشىلار سىمباتتى دا بەكزات جانۋاردىڭ داۋىسىن سالۋ ءۇشىن ءتۇرلى قۇرالدار پايدالانىلادى. ونىڭ ىشىندە شاياننىڭ نەمەسە ۇلۋدىڭ قابىرشاعى، بۇقانىڭ ءمۇيىزى، پلاستيك تۇتىكتەر، ءتىپتى كادىمگى بوتەلكەلەر دە بار. ال تاجىريبەلى اڭشىلار بۇعىنى ەشقانداي قۇرالسىز ورماننان شىعارىپ الارىنا سەنىمدى.

بۇل بەلارۋس استاناسىندا ءوتىپ جاتقان العاشقى جارىس ەمەس. جانۋارلاردان ايلاسىن اسىرماققا بەكىنگەن سايىسكەرلەر بىلتىر دا ءدال وسىلاي باس قوسقان. ۋىلدەگەن ءۇننىڭ جاڭعىرىعى بيىل باسىمداۋ بولىپ وتىر. سايكەسىنشە، قازىلار القاسى دا سايىسكەرلەر اراسىنان ەڭ ۇزدىكتى انىقتاۋعا باسا كوڭىل ءبولدى.

اڭدى الداپ شاقىرۋدىڭ شەبەرى اتانۋ ءۇشىن ورماندا ءجيى بولىپ، ولاردى تىڭداي ءبىلۋ قاجەت. سونىمەن بىرگە ەگەر مينسكىنىڭ قاق ورتاسىندا ءجۇرىپ، بۇعىنىڭ باقىرعان داۋىسىن ەستي قالساڭىز، شوشىپ كەتپەي بىردەن سولاي قاراي اسىعىڭىز. سوندا عانا ءسىز وسىناۋ وزگەشەلەۋ سايىستىڭ ەڭ ءبىر قىزىقتى دا قايتالانباس ساتتەرىنە كۋا بولارىڭىز انىق.

www.24.kz