تۇركيالىق قايىرشى ميلليونەر بولىپ شىقتى

استانا. قازاقپارات - تۇركيانىڭ بۇقارالىق اقپارات قۇرالدارى مەن الەۋمەتتىك جەلىلەرىندە «پاكەت اتا» ەسىمدى ءمۇساپىر جارىسا جازىلۋدا.

كونيا قالاسىنىڭ كوشەلەرىن توزدىرىپ، قايىرشىلىقپەن اينالىسقان اتاعا «پاكەت اتا» )پاكەت- قالتا، دوربا)  ەسىمى كيىمىنىڭ ورنىنا پاكەتتەردى قۇراپ كيگەنى ءۇشىن بەرىلگەن ەكەن.

 75 جاستاعى «پاكەت اتا» وتكەن سەنبى كۇنى قازا تاپتى. اۆتوبۋس قاعىپ كەتكەن ەكەن. ۇستىنە كيگەن قانشاما پاكەتتىڭ اراسىنان تەك ءبىر ءتىلىم نان عانا شىققان.

 ەڭ قىزىعى، پوليسيا قىزمەتكەرلەرى بۇل قايىرشىنىڭ كىم ەكەنىن زەرتتەۋ بارىسىندا ونىڭ ميلليونەر بىرەۋ بولىپ شىققانىن انىقتاعان. مەحمەت كەلەش ەسىمدى «پاكەت اتانىڭ» ەكى بانكتەن اشقان ەسەپشوتىنان 1 ميلليون 100 مىڭ ليرا اقشاسى شىققان. ءبىزدىڭ تەڭگەمەن ەسەپتەسەك، 89 ميلليون 540 تەڭگە. سويتسە، بانكتەگىلەردىڭ ايتۋىنشا، «پاكەت اتا» اندا- ساندا ءبىر كاستوم- شالبارىن كيىپ بانككە كەلىپ اقشا سالىپ تۇرادى ەكەن. قانشاما جىلدار بويى تىلەنشىلىكتەن وسىنشاما اقشا جيناعان شال وسىلايشا جۇرتتى قايران قالدىردى.

مەحمەت كەلەش چورۋم قالاسىندا ەكى رەت ۇيلەنىپتى. الايدا، ەكى ايەلىنەن دە بالاسى بولماعاندىقتان، ولاردان اجىراسىپ، كوشەدە قايىر سۇراپ كەتكەن. باستاپقىدا انكارا، ىستامبۇل، يزمير قالالارىنىڭ كوشەلەرىندە جۇرەدى. بۇل قالالاردان كەيىن كونيا قالاسىنا كەلەدى. بۇل قالادا 34 جىل بويى كوشەدە ءومىر سۇرەدى.

 «پاكەت اتانىڭ» دۇنيەدەن وزعاننان كەيىن تۋىسقاندارى دا تابىلا باستاعان. «پاكەت اتا» جايىندا حابارلاردان ەستىگەن چورۋم قالاسىنىڭ تۇرعىنى، 57 جاستاعى حاتيجا ەردا ءوزىن مەحمەت كەلەشتىڭ جيەنى ەكەنىن ايتىپ، 55 جاستاعى ءسىڭىلىسى سيەۆيم ارسلان ەكەۋى «پاكەت اتانىڭ» ءمايىتىن الۋعا كونياعا كەلەدى.

 ناعاشىسىن وسىدان 34 جىل بۇرىن عانا كورگەنىن ايتقان حاتيجا ەردا: «ناعاشىم اسكەردەن كەلگەن سوڭ پسيحيكالىق اۋرۋعا ۇشىراعان ەدى. ەكى رەت ۇيلەنىپ، اجىراسقان. 1972 -جىلى ىستامبۇلعا مەنىڭ جانىما كەلدى. قاسىمدا ءبىرشاما ۋاقىت قانا تۇرىپ، كونياعا كەتتى. سودان باستاپ ونى ەش كورگەن ەمەسپىن»، -  دەيدى.

حاتيجا ونىڭ بانك ەسەپشوتىنداعى اقشادان ەش حابارى بولماعانىن، تەك كونياعا كەلە جاتقاندا سىڭىلىسىنەن عانا بىلگەنىن ايتىپ وتىر. ءسىڭىلىسى دە حابارلاردان ەستىگەن. «ءبىزدى ونىڭ اقشاسى ەش قىزىقتىرمايدى. ءبىز تەك سۇيەگىن الىپ، اۋىلىمىزدا جاتقان اكەسى مەن اناسىنىڭ قاسىنا جەرلەمەكپىز»، -  دەيدى ول.

مىنە، «پاكەت اتا» دۇنيەدەن وسىلايشا ءماشھۇر بولىپ وزعانىمەن، قانشاما جىلدار بويى تىلەنشىلىكپەن تىرنەكتەپ جيناعان ميلليونىن وزىمەن بىرگە الىپ كەتە المادى.

slam.kz