قازاقتاردى قايران قالدىرعان كارىس قىزى
قازاقستان دەلەگاتسياسىنا بولىنگەن جەرگىلىكتى اۋدارماشىلاردىڭ اراسىندا ءبىر جاس جىگىت ورىس تىلىندە ءتاپ- ءتاۋىر سويلەيدى. ق ر مادەنيەت جانە سپورت مينيسترلىگىنىڭ سپورت جانە دەنە شىنىقتىرۋ ىستەرى كوميتەتىنىڭ قىزمەتكەرلەرىمەن نەمەسە ءبىزدىڭ سپورتشىلارمەن جۇرگەنىندە ءجيى كەزدەسىپ قالامىز. كەيدە جۇمىس بابىمەن ينچحونداعى قازاقستان جۋرناليستەرىنە دە كەلىپ تۇرادى. ءاۋ باستا- اق ءوزىن اندرەي دەپ اتاۋىمىزدى وتىنگەن. ءوزىنىڭ ايتۋى بويىنشا، سانكت- پەتەربۋرگتە وقىعان.
سودان سوڭ تومپيعان ءبىر سارى قىز بار. باسىندا قازاق ەكەن دەپ قالدىق. ويتكەنى قازاق تىلىندە كوپ- كورىم سويلەيدى. سويتسەك، قازاق ەمەس، كارىس قىزى. اتى- ءجونى - وجانگ مي. ءوزىنىڭ ايتۋىنشا، ەسىمىنىڭ قازاقشا ماعىناسى - راۋشان.
كارىستىڭ «راۋشانى» قازاقستاندا وقىپ، ءبىلىمىن جەتىلدىرىپتى. ءتورت جىل قىسقا مەرزىمگە كەلىپ، الماتىداعى ءال- فارابي اتىنداعى قازاق ۇلتتىق ۋنيۆەرسيتەتىندە ءدارىس العان. سوڭعى رەت كەلگەنىندە، ءبىر سەمەستر وقىعان.
قازاقشانى الماتىعا بارماي تۇرىپ ۇيرەنىپتى. قازىر ءوزى سەۋلدە تۇرادى ەكەن. ازيا ويىندارى قارساڭىندا «سارى قۇرلىقتاعى» ەلدەردىڭ تىلدەرىن بىلەتىن ۆولونتەرلەر قۇرامى جاساقتالعاندا، «راۋشان» قازاقستان دەلەگاتسياسىنا اۋدارماشى بولۋعا نيەت بىلدىرگەن.
راس، قازاقشانى زۋىلداتىپ تەز سويلەمەيدى. ءبىراق تۇسىنىكتى ەتىپ اۋدارا الادى، ويىن تولىق جەتكىزە بىلەدى. ول اسىقپاي قازاقشا سويلەي باستاعانىندا، «قازاقشا ءسوز قورى جەتپەي، قينالىپ تۇر ما» دەپ ويلاپ، اڭگىمە اۋانىن ورىسشاعا اۋدارۋعا تىرىساتىندار دا بار. ونداي دا، وجانگ مي «جوق، ءوزىمىزدىڭ قازاقشامىزبەن سويلەي بەرەيىك» دەپ بايەك بولادى.. .
مىنە، كورەيانىڭ «راۋشانى» وسىنداي جان. كەزدەسە قالساڭ، ۇنەمى كۇلىمسىرەپ، ىزەت كورسەتىپ تۇرادى.
