ارال تەڭىزىنىڭ شىعىس بولىگى تولىقتاي قۇرعادى

استانا. قازاقپارات - ارال تەڭىزىنىڭ ايدىنى تۇتاستاي تارتىلۋعا جاقىن. تەڭىزدىڭ وزبەكستان اۋماعىنداعى ايدىنى تۇگەلدەي كەۋىپ قالدى. ن ا س ا ساراپشىلارىنىڭ زەرتتەۋى وسىنى ايعاقتاپ وتىر.

 «بيىل ارالدىڭ شىعىس بولىگى تارتىلىپ، تولىق جويىلدى» ، - دەيدى ميچيگان ۋنيۆەرسيتەتىنىڭ  گەوگرافى، ارال تەڭىزى بويىنشا ساراپشى  فيليپپ ميكلين. بۇعان سەبەپ - تەڭىز باسسەينى باستاۋ الاتىن پامير تاۋلارىنا قار از تۇسكەن، جاۋىن- شاشىن مولشەرى دە ازايعان. «سونىڭ سالدارىنان امۋدارياداعى سۋ دەڭگەيى تومەندەدى»، - دەيدى امەريكالىق زەرتتەۋشى.  
 
 ايتا وتەيىك، قازاقستان مەن وزبەكستان مەملەكەتتەرىنىڭ شەكارالارىندا ورنالاسقان ارال تەڭىزى 1960- جىلدارى كولەمى جاعىنان الەمدەگى الىپ تەڭىزدەردىڭ ءتورتىنشىسى بولاتىن. الايدا سوڭعى 40 جىل ىشىندە ونىڭ اۋدانى ەكى ەسە ازايىپ، سۋ دەڭگەيى 18 شاقىرىمعا الىستادى. سۋدىڭ تۇزى كوبەيىپ، ىزىنشە بالىعى جويىلا باستادى. كەڭەس وداعى كەزىندە «ارالدى قۇتقارۋ» باعدارلامالارى قولعا الىنعان. دەگەنمەن، قاراجاتتىڭ جەتىسپەۋىنەن بۇل جۇمىستار توقتاتىلعان بولاتىن. ارالدىڭ قازاقستاندىق بولىگىندە، كولشىكتەر جۇيەسىندەگى سۋدى ساقتاۋ ءۇشىن،  «كىشى ارال»  جوباسى جۇزەگە اسىپ جاتقانى ءمالىم.   

 «استانا» ارناسى