قازاقستانداعى دەنساۋلىق ساقتاۋدىڭ كەي سالاسى شۆەتسياداعى كورسەتكىشپەن بارابار
بۇل تۋرالى دۇنيەجۇزىلىك دەنساۋلىق ساقتاۋ ۇيىمىنىڭ قازاقستانداعى وكىلى مەليتا ۆۋينوۆيچ الماتىداعى پەريناتالوگيا مەن بالالار كارديوحيرۋرگياسى ورتالىعىنا ساپارى بارىسىندا ءمالىم ەتتى.
ونىڭ ايتۋىنشا، بۇل كورسەتكىشكە جەتۋ تەك دەنساۋلىق ساقتاۋ سالاسىنداعى جەتىستىكتەرگە بايلانىستى بولىپ وتىر.
«قازاقستان بالا ءولىمى كورسەتكىشىنىڭ ازايۋىنا بايلانىستى 17 ورىنعا العا جىلجىدى. بۇل اقپاراتتى داۆوس ەكونوميكالىق فورۋمىنان ەستىدىڭىزدەر. 2012 - جىلعى ناتيجە بويىنشا قازاقستاندا مىڭ ادامعا شاققاندا بالا ءولىمى كورسەتكىشى 16,7 نى قۇرادى. 2013 -جىلعى كورسەتكىش ودان دا جاقسى ەكەندىگىنە سەنىمىم مول» ، - دەدى مەليتا ۆۋينوۆيچ.
ماماننىڭ ايتۋىنشا، سوڭعى ءۇش جىلدا قازاقستان مەديسيناسىندا جۇزەگە اسقان جۇمىستار كوپ ماسەلەنىڭ شەشىمى تابۋعا سەپتىگىن تيگىزدى. وتكەن جىلى دۇنيەجۇزىلىك دەنساۋلىق ساقتاۋ ۇيىمى قازاقستانداعى بالا ءولىمىن زەرتتەۋ ماقساتىندا ارنايى حالىقارالىق توپ قۇرىلعان بولاتىن.
«استانادا قۇرىلعان توپ قازاقستاندىقتاردىڭ ءومىر ءسۇرۋى، نەكەلەسۋى بويىنشا مەديسينالىق ستاتيستيكا جاسادى. ءبىز سونداي- اق، ۇلتتىق ستاتيستيكا اگەنتتىگىنەن دە مالىمەت الدىق. جۇمىس توبىنىڭ قورىتىندىسى بويىنشا قازاقستاندا بالا ءولىمى كورسەتكىشى تومەندەگەن دەگەن پىكىرگە كەلدىك» ، - دەدى ول.
مەليتا ۆۋينوۆيچ قازاقستاننىڭ بارلىق وڭىرلەرىندە ايەلدەردى بوساندىرۋ د س ۇ تالاپتارى مەن تەحنولوگيالارىنا ساي جۇزەگە اساتىنىن اتاپ ءوتتى.
«بىزگە نيۋ- يوركتان، جەنيەۆادان، گارۆاردتان ساراپشىلار كەلدى. ولارعا وسىنداعى سالماعى 1 كەلىگە تولمايتىن شاقالاقتار ادام قاتارىنا قوسىلىپ كەتەدى دەسەك، ەشكىم سەنبەيدى. شىن مانىندە، قازاقستاننىڭ كورسەتكىشى شۆەتسياداعى كورسەتكىشپەن بارابار»، - دەدى م. ۆۋينوۆيچ.
اۆتور: گۇلميرا عوسمانالي
