ەرتىس وزەنىنىڭ بويىمەن كەمە قاتىناسى دامىتىلماق

استانا. قازاقپارات - اتىراۋدا ءوتىپ جاتقان قازاقستان مەن رەسەيدىڭ Ⅺ ءوڭىرارالىق ىنتىماقتاستىق فورۋمى اياسىندا پاۆلودار وبلىسىنىڭ اكىمى قانات بوزىمبايەۆ پەن ر ف ومبى وبلىسىنىڭ گۋبەرناتورى ۆيكتور نازاروۆ ەكونوميكالىق، الەۋمەتتىك جانە كولىك سالاسىمەن قوسا باسقا دا باعىتتار بويىنشا ىنتىماقتاستىق جونىندەگى نيەت حاتتاماعا قول قويدى.

بۇل تۋرالى وبلىس اكىمدىگىنىڭ باسپا ءسوز قىزمەتىنەن حابارلادى.

ەكى جاق ترانزيتتىك- كولىكتىك ءدالىزدى، ونىڭ ىشىندە ەرتىس وزەنىنىڭ بويىمەن كەمە قاتىناسىن، كاسىپكەرلىك سۋبەكتىلەرى اراسىنداعى ىسكەري قاتىناستاردى قولداۋ جانە دامىتۋ ماسەلەلەرى بويىنشا ىنتىماقتاستىقتى جۇزەگە اسىرماق.

سونىمەن قاتار پاۆلودار وبلىسىنىڭ اكىمدىگى مەن ومبى وبلىسىنىڭ اكىمشىلىگى اۋىلشارۋاشىلىق ءونىمىن قايتا وڭدەۋ جانە ساقتاۋ، قۇرىلىس ماتەريالدارىن شىعارۋ ءوندىرىسىن دامىتۋعا، سونداي- اق ورتاق قۇرىلىس جوبالارىن ىسكە اسىرۋعا، جاڭا وندىرىستىك قۋاتتىلىقتى قۇرۋعا سەپتىگىن تيگىزەتىن بولادى.

«رەسەيلىك ارىپتەستەرىمىز اراسىندا قول قويىلعان قۇجات ەكونوميكا، كولىك، الەۋمەتتىك جانە گۋمانيتارلىق سالالارعا قاتىستى بولۋدا. سونىمەن قاتار وسى ۋاقىتقا دەيىن جاساسقان كەلىسىمدەردى جۇزەگە اسىرۋ ساراپتاماسىن جاسايمىز. ومبى ءوڭىرى مەن پاۆلودار وبلىسى اراسىنداعى تىعىز قارىم- قاتىناسىمىز نىعايا بەرمەك»، - دەيدى پاۆلودار وبلىسىنىڭ اكىمى قانات بوزىمبايەۆ.

بۇگىندە قوس ءوڭىر اراسىنداعى سىرتقى تاۋار اينالىمى 2,8  ميلليارد  ا ق ش دوللارىنا قۇراپ وتىر. وبلىستا جۇزدەن استام بىرلەسكەن كاسىپورىن جۇمىس ىستەپ تۇر.

ەستەرىڭىزگە سالا كەتەيىك، ومبى وبلىسىنا جاسالعان ساپار اياسىندا پاۆلودار مەن ومبى وبلىستارىنىڭ اراسىندا جالپى قۇنى 4 ميلليارد تەڭگەدەن استام كەلىسىمگە قول قويعان بولاتىن.