قازاقستاندا تاۋلىك سايىن مىڭنان استام ءسابي دۇنيەگە كەلەدى

استانا. قازاقپارات - قازاقستاندا تاۋلىك سايىن مىڭنان استام ءسابي دۇنيەگە كەلەدى. بۇل تۋرالى بۇگىن ق ر پرەزيدەنتى جانىنداعى ورتالىق كوممۋنيكاتسيالار قىزمەتىندە وتكەن بريفينگتە ق ر دەنساۋلىق ساقتاۋ جانە الەۋمەتتىك دامۋ مينيسترلىگى مەديتسينالىق كومەكتى ۇيىمداستىرۋ دەپارتامەنتىنىڭ ديرەكتورى ماعريپا ەمبەرگەنوۆا ءمالىم ەتتى.

«ءبىزدىڭ ەلىمىزدە كۇن سايىن 1 مىڭنان استام، ال جىلىنا 400 مىڭعا جۋىق ءسابي دۇنيەگە كەلەدى. بۇل قۋانارلىق جايت. ويتكەنى، دەموگرافيالىق احۋال وڭ سانالادى. تۋۋ كورسەتكىشىنىڭ ءوسىمى اياسىندا ءولىم-ءجىتىم تومەندەپ وتىر»، - دەدى دەپارتامەنت باسشىسى.

ونىڭ سوزىنە قاراعاندا، سوڭعى 1 جىلدىڭ ىشىندە ەلىمىزدە بالا تۋۋ كورسەتكىشى 25 پايىزعا ءوستى. بۇعان قوسا، شالا تۋعان بالالاردىڭ ومىرگە بەيىمدەلۋ كورسەتكىشى دە جىلدان-جىلعا ارتىپ كەلەدى.

«ەگەر 5 جىلدىڭ ىشىندە سالماعى 1500 گرامدىق سابيلەردىڭ ءتىرى قالۋ كورسەتكىشى 30 پايىز بولسا، بۇگىندە بۇل كورسەتكىش 60 پايىزدى قۇراپ وتىر. 2008-جىلى شالا تۋعان بالالاردىڭ تەك 40 پايىزى عانا ءتىرى قالاتىن»، - دەدى م. ەمبەرگەنوۆا.

دەپارتامەنت ديرەكتورىنىڭ ايتۋىنشا، ەلىمىزدە شالا تۋعان سابيلەردىڭ العاشقى 7 كۇننىڭ ىشىندە شەتىنەۋ كورسەتكىشى دە 2,5 ەسەگە تومەندەگەن.

«بۇل ەڭ ۇزدىك كورسەتكىش. ياعني، ءبىز سابيلەردى قورعاي الامىز، باعىپ-كۇتە الامىز. ناتيجەسىندە بىزدە انا ءولىمى - 3 ەسەگە، سابيلەردىڭ شەتىنەۋى - 1,6 ەسەگە قىسقاردى»، - دەدى ول.

 اۆتور: مارلان جيەمباي