قاز ۇ ت ۋ مەن لانجوۋ ۋنيۆەرسيتەتى اراسىندا ىنتىماقتاستىق تۋرالى مەموراندۋمعا قول قويىلدى

الماتى. قازاقپارات - الماتىدا ق. ي. ساتبايەۆ اتىندعى قازاق ۇلتتىق تەحنيكالىق ۋنيۆەرسيتەتى مەن قىتايدىڭ گانسۋ پروۆينسياسىنداعى لانجوۋ ۋنيۆەرسيتەتى ارالىعىندا ىنتىماقتاستىق جانە شانحاي ىنتىماقتاستىق ۇيىمى (ش ى ۇ) ۋنيۆەرسيتەتىنىڭ ەكولوگيا باعىتى بويىنشا مەموراندۋمعا قول قويىلدى.

 بۇل شارا لانجوۋ ۋنيۆەرسيتەتىنىڭ رەكتورى، پروفەسسور ۆان چەننىڭ قاز ۇ ت ۋ-عا كەلگەن ءىسساپارى بارىسىندا جۇزەگە استى. قازاقستان تاراپىنان مەموراندۋمعا قاز ۇ ت ۋ رەكتورى، پروفەسسور جەكسەنبەك ءادىلوۆ قول قويدى.

ەندى قول قويىلعان قۇجاتتار شەڭبەرىندە اكادەميالىق سالادا مىناداي ورتاق شارالار جۇزەگە اسىرىلاتىن بولادى. ولار:

1. پروفەسسورلىق- وقىتۋشىلىق قۇرام بويىنشا، عالىمدار مەن اكىمشىلىك قىزمەتكەرلەر قۇرامى بويىنشا ءوزارا الماسىمدار جاساۋ؛

2. ماگيسترانتتار مەن PhD دوكتورانتتاردى بىرلەسە وقىتۋ؛

3. بىرلەسكەن عىلىمي-زەرتتەۋ جوبالارىن ازىرلەپ، جۇزەگە اسىرۋ؛

4. بىرلەسكەن حالىقارالىق كونفەرەنتسيالار وتكىزۋ؛

5. اكادەميالىق اقپاراتتارمەن جانە ماتەريالدارمەن ءبولىسۋ؛

6. ستۋدەنتتەردى ماشىقتاندىرۋ ىستەرىنە قاتىستىرۋ باعدارلامالارىنا بىرلەسە دەمەۋشىلىك كورسەتۋ؛

7. ءوزارا كەلىسىمشارتتار نەگىزىندە باسقا دا اكادەميالىق ىنتىماقتاستىقتاردىڭ ورناۋىنا ىقپال جاساۋ.

ەندى، ەكى جاقتى كەلىسىم بويىنشا ناقتى شارالاردى ازىرلەپ، جۇزەگە اسىرۋ - لانجوۋ ۋنيۆەرسيتەتىنىڭ جاراتىلىس تانۋ ينستيتۋتىنىڭ بازاسىندا باستالۋى ءتيىس. جانە ەكى ۋنيۆەرسيتەتتىڭ جاعدايىنا سايكەس، باسقا فاكۋلتەتتەر مەن ينستيتۋتتاردا جالعاسىن تابادى.

پروفەسسور ۆان چەن باستاعان قىتايلىق دەلەگاتسيانى جىلى شىرايمەن قارسى العان قاز ۇ ت ۋ رەكتورى جەكسەنبەك ءادىلوۆ قوناقتاردى ەلىمىزدىڭ باستى تەحنيكالىق جوعارى وقۋ ورنىنىڭ قىزمەتىمەن تانىستىردى. ول ءوز سوزىندە اتالمىش ۋنيۆەرسيتەتتىڭ كەڭەس زامانىندا دا وداقتىڭ ەڭ ۇزدىك ون ۋنيۆەرسيتەتىنىڭ قاتارىندا بولعاندىعىن، قازىرگى تاڭدا دا ايتۋلى جەتىستىكتەرگە قول جەتكىزىپ كەلە جاتقاندىعىن تىلگە تيەك ەتتى.

«قاز ۇ ت ۋ - قازاقستاننىڭ تەحنيكالىق جوعارى وقۋ ورىندارا اراسىندا ەڭ جوعارى رەيتينگكە يە. سونداي-اق بيىل ءبىزدىڭ ۋنيۆەرسيتەت 

ۇلى بريتانيانىڭ «Times Higher QS World University Rankings» اتتى رەيتينگتىك اگەنتتىگىنىڭ الەم ۋنيۆەرسيتەتتەرى رەيتينگىنە ەندى» - دەدى ءوز سوزىندە ج. ءادىلوۆ.

پروفەسسور ۆان چەن قاز ۇ ت ۋ رەكتورى مەن ۇجىمىنا جىلى شىرايمەن قارسى العاندارى ءۇشىن ريزاشىلىعىن ءبىلدىرىپ، ءوز ۋنيۆەرسيتەتىنىڭ جۇمىسىمەن دە تانىستىردى.

«ءبىزدىڭ ۋنيۆەرسيتەت قىتايدىڭ سولتۇستىگىندە، گانسۋ پروۆينسياسىندا ورنالاسقان. ستۋدەنتتەر تەحنيكالىق، گۋمانيتارلىق جانە مەديتسينالىق باعىتتا ءبىلىم الادى. قازىرگى تاڭدا ءبىزدىڭ جوعارى وقۋ ورنىندا 30000 ستۋدەنت ءبىلىم الادى. سىزدەردىڭ ۋنيۆەرسيتەتتەرىڭىز ەلدەگى الدىڭعى قاتارلى تەحنيكالىق جوعارى وقۋ ورنى. ءوزىنىڭ عىلىمي جوبالارىمەن تانىمال. سوندىقتان دا ءبىز سىزدەرمەن عىلىم جانە ءبىلىم بەرۋ سالاسىندا ىنتىماقتاستىق ورناتقىمىز كەلەدى» - دەدى ءوز سوزىندە ۆان چەن.

ايتا كەتەلىك، شانحاي ىنتىماقتاستىق ۇيىمىنىڭ ۋنيۆەرسيتەتى (ش ى ۇ ۋنيۆەرسيتەتى) - جەلىلىك ۋنيۆەرسيتەت، ياعني ازيا ايماعىنداعى حالىقارالىق ءبىلىم بەرۋ باعدارلاماسى. ش ى ۇ ۋنيۆەرسيتەتى - ءبىرتۇتاس ەۋروپالىق ءبىلىم كەڭىستىگى جۇيەسىنىڭ ازيالىق بالاماسى. 2008 -جىلى 28 - قازاندا استانا قالاسىندا ش ى ۇ مۇشە ەلدەردىڭ ءبىلىم مينيسترلەرىنىڭ وتىرىسىندا اتالمىش ۋنيۆەرسيتەتتىڭ تۇجىرىمداماسى العاش رەت قابىلدانعان بولاتىن.

اۆتور: جاپپاربەرگەن ايبوتا