جاتىردا جاتقان جاقسىلىق جاساۋشى
ۇلبوسىن قۇرساق تۇسىن ساپ-سالقىن سايمانمەن باسىپ وتىرعان دارگەرگە: «سەمەيدىڭ ابىرالىسىنان» دەپ قىسقا جاۋاپ قايتاردى.
دارىگەر ايەلدىڭ «ءى... ءى... ءى... م» دەگەن ءۇنى سوزگە بەرگىسىز ماعىنالى ءارى ۇرەيلى ەستىلدى. ۇلبوسىن: «نەندەي جاعداي؟» - دەپ سۇراۋعا جۇرەگى داۋالامادى.
كوڭىلىنە ىزعارلى كۇدىك كولەڭكەسى تۇسە قالدى. سۋىق ويلار دا قىراۋداي ۇشقىنداپ قاپتاپ كەلەدى: «تۇرعانعا كۇيەۋگە شىعىپ، سەگىز جىل بويى ءبىر شاراناعا زار بولىپ، ەندى بىردەڭە بولا ما، دەگەندە نە بولدى تاعى؟!»
ۇلبوسىن: «ەكىقاباتپىن با، جوق پا؟» دەگەن ءسوزدىڭ تىلىنەن قالاي شىعىپ كەتكەنىن دە اڭدامادى.
دارىگەر بولسا: «ءيا...» دەگەندەي ءسوز بەن ءۇننىڭ ارالىعىنداعى ءبىر ساراڭ جاۋابىنا: «ءبىراق...» دەگەن ءسوزدى قوستى.
جاڭاعى كۇدىك كولەڭكەسى ەندى، قورقىنىشتىڭ قاراڭعىلىعىنا قاراي اۋىسىپ بارادى. ۇلبوسىننىڭ كوز جاسى ەمحانادان ۇيگە جەتكەنشە تيىلمادى. « ءوزىڭ ساقتاي گور، جاساعان...» دەپ، كۇبىرلەي بەرەدى.
ءۇش كۇن وتكەندە ءبارى دە ايقىن بولدى. تۇرعان مەن ۇلبوسىندى شاقىرعان دارگەرلەر كەڭەسى: «ءۇش ايلىق شارانانى ابورت ارقىلى الىپ تاساتاۋ قاجەت» دەگەن شەشىم شىعارعانىن حابارلادى.
ۇلبوسىن ءدال توبەسىنەن سەل قۇلاپ كەلە جاتقانداي: «نەگە!!!» دەپ شار ەتە ءتۇستى.
باس دارىگەردىڭ: «ىشتەگى ءۇش ايلىق شارانانىڭ وڭ جاق اياعى تىزەدەن تومەن كەم ەكەندىگى ۋ ز ي- دە انىقتالدى» دەگەندە تۇرعاننىڭ: «نەلىكتەن ولاي؟!!» دەپ وكسىك ارالاسا ىشقىنا شىققان سۇراعىنا: «رادياتسيا تۇقىمعا اسەر ەتكەن...» دەگەن قىسقا جاۋاپ ايتىلدى.
اتتەڭ! ادامنىڭ ءومىرى سۇراق پەن جاۋاپ ارقىلى شەشىلە سالسا، جان قينالىسى دەگەن بولماس ەدى-اۋ! جينالىپ وتىرعانداردىڭ ءبارىنىڭ كوڭىل كۇيى استاڭ-كەستەڭ بولدى. اياۋشىلدىق پەن زاڭشىلدىق، ادامگەرشىلدىك پەن ءسوزۋارلىق، كىسىلىك پەن رەسميلىك تايتالاسقان وي-پىكىرلەر سۋ بەتىندەگى سەڭدەي سوعىلىستى.
باس دارىگەردىڭ: «بۇل كەمشىلىك ۇلتىمىزدىڭ گەنوفونىنا زيان» دەگەنى، باسقالارىنىڭ «كەم ءسابي تۋعانشا، ساۋ ءسابي تاۋىپ الاسىز عوي...» دەپ الداۋسىراتقانى ۇلبوسىندى يلىكتىرە المادى.
قاباعىن قايعى كولەڭكەسى جاپقان ەكىقابات كەلىنشەك: «شولاقاياق بولسا دا ءوز بالامدى ءوز جاتىرىمدا ولتىرتە المايمىن!» دەگەن ءسوزى، سونشا نازىك ۇنمەن ەستىلسە دە انتتان دا سالماقتى ەستىلدى.
الاي-دۇلەي بوران ساپ تيىلعانداي تىم- تىرىس ورنادى. ۇنسىزدىكتى بەس دارگەردىڭ ىشىندە وتىرعان ەڭ جاستاۋى ىدىرىس ەسىمدى جىگىتتىڭ ءسوزى وياتتى:
«ءتانى كەم بولسا دا، جانى كەمەل بولسا شە؟!»
سەڭگە سوعىلعانداي قوس الاقانىمەن باسىن ۇستاپ، ءبىر ءسوز ايتا الماي وتىرعان تۇرعان: « ءامين...» دەپ كۇبىر ەتتى... كوزىنەن دە تىرس، تىرس جاس تامىپ جاتتى. وسى جالعىز اۋىز ءسوز دارىگەرلىك كەڭەستىڭ شەشىمىن توقتاتتى، ابورت جاساۋعا قول قويىلماي قالدى.
وسىناۋ قايعى مەن قۋانىش قايشىلاسقان وقيعادان كەيىن دە اققان وزەندەي ارقىراپ وتىز جىل وتە شىققان ەدى...
تۇرعان مەن ۇلبوسىن وڭ اياعى كەم تۋعان ۇلدارىنىڭ اتىن «تاڭىرىس» دەپ قويعان-دى. جاندارى جالعىز ۇلدارىنىڭ ۇستىندە بولدى. ونىڭ كوڭىلىنە قاياۋ تۇسىرمەۋگە بارىن سالدى، بار تىرلىكتەرىن سونىڭ جاقسى تاربيەسىنە ارنادى. تاڭىرىس تا وقۋدا الدىنا بالا سالماي ساڭلاق وقۋشى دەگەن اتى شىقتى. ول اناسىنىڭ تىلەگى بويىنشا دارىگەر ماماندىعىن تاڭدادى. الماتى مەدۋنيۆەرسيتەتىن ەرەكشە ۇزدىك بىتىرگەن سوڭ، از جىلدا شاڭحاي، سەۋل، توكيودا كاسىبي ءبىلىمىن جەتىلدىرىپ، دۇنيەجۇزىنىڭ مەديكتەرىن ءدۇر سىلكىندىرگەن جاڭالىق تا اشتى... دارىگەرلىك اتاعى قازاقستاننان شىعىپ شەتەلگە جايىلدى...
قارتاڭ دارىگەر رەانيماتسيا بولىمىندە ەسى كىرگەندە ءوزىنىڭ ءتىرى ەكەنىنە قايران قالدى. «كەڭ كولەمدەگى ينفاركت» دەگەن دياگنوز قويىلعان ادامنىڭ ءتىرى قالۋى ەكىتالاي بولاتىن.
كارديولوگ قىز ءنۇرابيا سىرقاتىنىڭ كوزىن اشقانىن كورىپ، جانىنا قۋانا جەتىپ كەلدى: «ىدىرىس اعا، سىزگە كومەك بولعان مىناۋ ءدارى!» دەپ كوز الدىنا ءبىر امپۋلانى توستى.
دۇنيەگە قايتا كەلگەندەي بولىپ، اينالاسىنا تاڭىرقاپ جاتقان قارت دارىگەر شىنى ساۋىتتىڭ بۇيىرىنە لاتىنشا جازىلعان «TANIRIS» دەگەن ءسوزدى وقىدى.
كارديولوگ قىزدىڭ: «بۇل ەرەكشە ءدارى جۇرەك قان تامىرىنداعى ترومبىلاردى بىرنەشە سەكۋندتا-اق ەرىتىپ جىبەرەدى. تەك ۇلگەرىپ ەگىلسە بولدى، قانداي اۋىر ينفاركت تا امان قالادى!» دەگەندى ماقتانىشپەن ايتىپ تۇردى.
قارت دارىگەر ىدىرىس: «بۇل - تاڭىرىس تۇرعان ۇلىنىڭ ويلاپ تاپقان اتاقتى ءدارىسى عوي!» دەگەندە كوز الدىنا وسىدان وتىز جىل بۇرىنعى قۇرساعىن قوس الاقانىمەن باسىپ، ءمولدىر جانارىنان مونشاقتاي جاسى توگىلىپ وتىرعان اققۇبا كەلىنشەك ەلەس بولىپ كەلە قالدى.
سىرقات حالدەگى قارت دارىگەردىڭ كوز جاسىمەن قوسا اۋىزىنان شىققان:
«جاتىرداعى جاقسىلىق جاساۋشىم مەنىڭ...» دەگەن وزىنە عانا تۇسىنىكتى ءسوزىن دارىگەر قىز پايىمداي العان جوق. قارت دارىگەر ساۋىققان سوڭ مىناۋ جاس دارىگەر قىزعا ءبارىن دە ايتارمىن، دەپ تولعانىپ جاتتى.
اباي حامزا
islam.kz
