حالىقتىڭ ىقىلاسى جوعارى، ناسيحاتى ناشار
ءبىز اركەز سوزگە توقتالعان، ءسوز يەسىن، اقىنداردى قۇرمەتتەگەن حالىقپىز، دەدى «نۇر وتان» پارتياسىنىڭ ساياسي جۇمىس دەپارتامەنتى باسشىسىنىڭ ورىنباسارى عالىمجان وتەلباي قاراعاندىدا وتكەن «ەرلەرىم ەڭبەك ەتكەن جەر» اتتى رەسپۋبليكالىق اقىندار ايتىسىندا.
«مىڭداعان جىلدار وتسە دە، ايتىسقا دەگەن حالىقتىڭ ىقىلاسى ارتپاسا، باسىلعان ەمەس. مىنە، بۇدان وسى ونەردىڭ حالىقتى بىرىكتىرىپ، ۇلتتى ۇيىستىرىپ، سونىمەن بىرگە جاستاردى ەڭبەك ەتۋگە ۇگىتتەپ، ۇرپاق تاربيەلەۋدەگى اتقارىپ جاتقان تالىمدىك-تاربيەلىك قىزمەتىنىڭ ماڭىزدىلىعىن بايقاۋعا بولادى»، - دەپ اتاپ ءوتتى ول.
پارتيا وكىلىنىڭ ايتۋىنشا، «نۇر وتاننىڭ» نەگىزگى ماقساتى دا ەلدىڭ مۇڭ-مۇقتاجىن ءبىلىپ، كەمشىلىكتەردى جاسىرماي تالقىلاپ، ونىڭ وڭتايلى شەشىمىن تاۋىپ، مەملەكەتتىك ورگاندارمەن بىرلەسە ورىنداۋ. ال بۇل ايتىس كەزەكتى رەت سوعان جول اشقان.
سونداي-اق، ع. وتەلباي پارتيانىڭ بۇعان دەيىن تالدىقورعان، اقتاۋ، تاراز قالالارىندا ءدۇبىرلى ايتىستاردىڭ وتكىزىلۋىنە مۇرىندىق بولعانىن ءسوز ەتتى.
«اتا-بابامىزدان قالعان ايتىس ەگەمەندىكتىڭ، تۇراقتىلىقتىڭ ارقاسىندا دامىپ كەلەدى. وسىنداي ۇلتتىق ونەردى «نۇر وتان» پارتياسى ءاردايىم قولداۋعا دايىن»، - دەپ ءسوزىن تۇيىندەدى ساياسي جۇمىس دەپارتامەنتى باسشىسىنىڭ ورىنباسارى.
ايتا كەتەيىك، كەشە «نۇر وتان» پارتياسىنىڭ قولداۋىمەن پارتيانىڭ 15 جىلدىعى مەن قاراعاندى قالاسىنىڭ 80 جىلدىعىنا ارنالعان رەسپۋبليكالىق اقىندار ايتىسى ۇيىمداستىرىلدى. سايىس ناتيجەسىندە باس جۇلدەنى استانالىق اقىن جانداربەك بۇلعاقوۆ جەڭىپ السا، ءبىرىنشى ورىندى الماتى وبلىسىنىڭ اقىنى سارا توقتامىسوۆا، ەكىنشى ورىندى استانالىق جاقسىلىق ورىنباساروۆ، ءۇشىنشى ورىندى جامبىلدىق اسەت دۇيسەبايەۆ پەن قاراعاندىلىق ايتباي جۇماعۇلوۆ يەلەندى. ولارعا ۇيىمداستىرۋشىلار تاراپىنان قوماقتى سىيلىقتار بەرىلدى.
