اۋعانستاندا ەلدىڭ جاڭا پرەزيدەنتىن ۇلىقتاۋ سالتاناتى وتەدى
سالتاناتتى ءراسىم كابۋلدە يسلام رەسپۋبليكاسى باسشىسىنىڭ سارايىندا وتەدى، دەپ حابارلادى يتار- تاسس.
اۋعانستاندا پرەزيدەنتتىڭ ۇلىقتاۋ سالتاناتىنا وراي رەسمي دەمالىس كۇنى بولىپ جاريالاندى. استانادا جانە پرەزيدەنت سارايىندا سوڭعى ازىرلىكتەر جۇرگىزىلۋدە. قالا كوشەلەرى تارتىپكە كەلتىرىلىپ، اۋعان ۇلتتىق جالاۋلارىمەن، پرەزيدەنتتىكتەن كەتەتىن حاميد كارزايدىڭ جانە ەلدىڭ جاڭا باسشىلارى - يسلام رەسپۋبليكاسىنىڭ باسشىسى اشراف گاني احمادزايدىڭ جانە پرەمەر- مينيستر ابدۋللا ابدۋللانىڭ پورترەتتەرىمەن بەزەندىرىلگەن.
كابۋلدا بۇرىن- سوڭدى بولماعان قاۋىپسىزدىك شارالارى قولعا الىندى. اۋعان ب ا ق- تارى جاڭا ءتارتىپتى «تەمىر شىمىلدىق» دەپ جاريالاپ ۇلگىردى، پوليسيا تورۋىلى كۇشەيتىلدى جانە ارميا قالاعا بارلىق كىرەبەرىستەردى، استانالىق باستى اۋدانداردى جاپتى، كۇش- قۇرىلىم قىزمەتتەرى بارلىق اۆتوكولىكتەردى ەگجەي- تەگجەيلى تەكسەرۋدە، جەكە قۇجاتتاردى جاپپاي تەكسەرۋ ءجۇرپ جاتىر.
شارا باعدارلاماسى بويىنشا ۇلىقتاۋ ءراسىمى اياقتالعان بويدا، اشراف گاني احمادزاي ەل پرەزيدەنتى رەتىندە پرەمەر- مينيستر ابدۋللادان جانە ەكى ۆيتسە- پرەزيدەنت - ابدۋل راشيد دۋستۋم مەن موحامماد سارۆار دانەشتەن انت قابىلدايدى.
«ءبىز كوپتەگەن شەتەلدىك قوناقتاردى، اۋعان ساياسي، قوعامدىق جانە ءدىني قايراتكەرلەرىن كۇتۋدەمىز»،- دەپ ءمالىم ەتتى اۋعانستان ۇكىمەتى حاتشىلىعىنىڭ وكىلى جاۆاد ناجي. اۋعان بيلىگى قاۋىپسىزدىك تالاپتارىنا بايلانىستى قاتىسۋشىلاردىڭ ناقتى سانىن جانە قۇرامىن جاريالاماي وتىر. دەگەنمەن باسپا ءسوزدىڭ حابارلاۋىنشا، ۇلىقتاۋعا 1,6 مىڭ ادام قاتىسپاق. قوناقتار اراسىندا - 200 شەتەلدىك مەملەكەتتەر مەن ۇيىمدار (شاڭحاي ىنتىماقتاستىق ۇيىمىنان دا) وكىلدەرى بار.
