تىك ءجۇرۋ ادامنىڭ قۋاتىن ارتتىرىپ، دەنساۋلىعىن جاقسارتادى

استانا. قازاقپارات - ەگەر ادام جۇمىستا ەڭكىش تارتىپ، بۇكىرەيىپ وتىراتىن بولسا ول دەپرەسسياعا بەيىم بولىپ، تەز شارشايدى. ونداي ادامنىڭ جۇيكەسى جۇقارىپ، اشۋشاڭ كەلەدى.

وسى ماسەلەگە قاتىستى عالىمدار ارنايى زەرتتەۋدە 74 ادامدى سىناپ كورىپ، ودان قۇتىلۋدىڭ جولىن كورسەتتى، دەپ جازادى The Daily Mail.

بۇكىرەيىپ وتىرعاننان ادام اعزاسى وزىنە قاجەتتى دۇنيەلەردى دۇرىس الا المايدى. قان اينالىمى السىرەپ، ميعا اۋا تولىق جەتپەي، باس اۋىرادى. اس قورىتۋ جۇيەسى دە سىر بەرىپ، ۇيقى باسادى. وندايدا ادام تەرەڭ تىنىستاپ دەم الا المايدى. وسىدان كەيىن، ادام كۇيزەلىسكە ۇشىراپ، مىنەزى بۇزىلادى. ارينە، ەر ادامنىڭ دا قۋاتى كەميدى. وسىنى ابدەن سارالاعان زەرتتەۋشىلەر 72 ادامدى ەكى توپقا ءبولىپ، زەرتتەۋ جۇرگىزەدى.

سىناق ۋاقىتىندا ولاردىڭ ءبىرى ادەتتەگىدەي جۇمىستا ەڭكىش تارتىپ وتىرسا، ەكىنشى توپ ارقاسىن تىك ۇستاپ وتىراتىن بولادى. ناتيجەسىندە ومىرتقاسىن ءتۇزۋ ۇستاعانداردىڭ ەڭسەسى كوتەرىلىپ، بويىندا قۋات ارتقانىن سەزگەن. ال، بۇكىرەيگەن توپ اۋىرلىق باسقان كۇيى سول باياعى قالىپتارىنان ارتىق ەش وزگەرىس سەزبەگەنىن ايتادى جانە ولاردىڭ 92 پايىزىنان تىك وتىرماعاندىقتىڭ كەسىرىنەن ويى شابان تارتىپ، بەلسەندىلىك از بولاتىنىن بىلدىرتكەن.

عالىمدار ايتۋىنشا، ارقانى تىك ۇستاۋ تالاي اۋرۋدىڭ الدىن الادى.