اقتاۋ مەكتەپتەرىندە وقۋشىنى ساۋساعىنىڭ تاڭبالارى ارقىلى انىقتايتىن قاۋىپسىزدىك جۇيەسى ەنگىزىلەدى

اقتاۋ. قازاقپارات - اقتاۋدا پيلوتتىق جوبا جۇزەگە اسىرىلۋدا. ونىڭ اياسىندا اقتاۋ قالاسىنىڭ ءبىلىم ءبولىمى جالپى ءبىلىم بەرەتىن بەس ورتا مەكتەپتە «مەكتەپ تەرەزەسى» اتتى اتا- انالارعا حابارلاندىرۋ مەن بيومەتريالىق قاۋىپسىزدىك جۇيەسى ورناتىلۋدا.

جۇيەنى ورناتۋ ءۇشىن №10,11,12,17 جانە 21 - مەكتەپتەر تاڭدالدى. 

  «بۇل بيو مەتريالىق جۇيە مەكتەپتىڭ كەز كەلگەن جۇيەلەرىمەن كىرىكتىرىلگەن. ول ەلەكتروندى جۋرنالدار مەن كۇندەلىكتەردى جۇرگىزۋگە مۇمكىندىك بەرەدى. بالا مەكتەپكە كىرگەن كەزدە ارنايى رۇقساتناماسى بولادى. سونىمەن بىرگە بالانىڭ ساۋساق ىزدەرى ارقىلى دا جۇيەدەن وتۋگە بولادى. تۋرنيكەتتەن وتكەن كەزدە اتا- انالارىنىڭ ۇيالى تەلەفوندارىنا بالانىڭ وقۋ عيماراتىنا قاي ۋاقىتتا كەلگەنى جانە ودان قاي ۋاقىتتا شىققانى جايلى س م س- حابارلاما كەلەدى. بۇل جۇيە مەكتەپكە بوگدە ادامداردىڭ باسىپ كىرۋىنەن قورعاپ، اتا- انالاردى مەكتەپ كەستەسى مەن وقۋشىنىڭ ۇلگەرىمى جايلى اقپاراتتاندىرۋعا مۇمكىندىك بەرەدى. ول تەك اتا- انالار ءۇشىن عانا ەمەس، مەكتەپ اكىمشىلىگى ءۇشىن دە قولايلى»، - دەدى اقتاۋ قالاسى ءبىلىم ءبولىمى باسشىسىنىڭ مىندەتىن اتقارۋشى سۆەتلانا تولەبايەۆا. 

  قازاقستاندا مۇنداي جۇيە تەك استانا قالاسىندا عانا بار. وعان ەلوردانىڭ 5 مەكتەبى قوسىلعان. اقتاۋ «مەكتەپ تەرەزەسى» جۇيەسى قولدانىلاتىن ەكىنشى قالا. 

  بەس مەكتەپكە وسى جۇيەنى ورناتىپ، قوسۋ ءۇشىن قالالىق بيۋدجەتتەن 27 ميلليوننان استام تەڭگە ءبولىندى، ياعني، ءار مەكتەپكە 5 ميلليون  432 مىڭ تەڭگەدەن بولىنگەن. مەردىگەرى «ەلەكترو سپەتس مونتاج» ج ش س بولىپ تابىلادى.   

  قازىرگى ۋاقىتتا مەكتەپتەردە تۋرنيكەتتەر ورناتىلدى. اتا- انالاردىڭ تىزىمدەرى جاسالىپ، ولاردىڭ ۇيالى تەلەفوندارىنىڭ نومىرلەرى انىقتالۋدا. قازان ايىنىڭ سوڭىنا قاراي بۇل جۇيە بارلىق بەس مەكتەپتە ىسكە قوسىلادى.