تالدىقورعان تۇرعىندارى قازا تاپقان ۇشقىشتاردى اقتىق ساپارعا شىعارىپ سالدى - فوتو
مارقۇمدارمەن قوشتاسۋ ءۇشىن قالا تۇرعىندارى ءى. جانسۇگىروۆ اتىنداعى مادەنيەت سارايىنا جينالدى. جيىنعا تالدىقورعان اسكەري گارنيزونىنىڭ وفيتسەرلەرى، ساربازدارى جانە الماتى وبلىسىنىڭ اكىمى اماندىق باتالوۆ، تالدىقورعان قالاسىنىڭ اكىمى ەرمەك الپىسوۆ قاتىستى.
سونداي-اق، جەرلەۋ راسىمىنە ق ر قورعانىس ءمينيسترىنىڭ ءبىرىنشى ورىنباسارى، ق ر ا ك باس شتابىنىڭ باسشىسى گەنەرال-پولكوۆنيك ساكەن جاسۇزاقوۆ جانە ا ق ك ا ك باس قولباسشىسى اۆياتسيا گەنەرال-مايورى نۇرلان ورمانبەتوۆ قاتىستى.
ساكەن ءادىلحان ۇلى قوشتاسۋ سوزىندە ق ح ر وتكەن اسكەري وقىتۋ جاتتىعۋدا ەرلانمەن بىرگە بولعان كۇندەردىن ەسكە الىپ، اسكەري قورعانىس كۇشتەرىندە قالتقىسىز قىزمەت اتقارعان دەنيس گوربۋنوۆ تۋرالى جىلى لەبىزىن ءبىلدىردى.
سونىمەن قاتار، گەنەرال-پولكوۆنيك قيىندىق تۇسكەن كەزدە ونى ءبولىسىپ، بار كومەگىن كورسەتكەن جەرگىلىكتى اتقارۋشى بيلىككە العىسىن ءبىلدىردى جانە قورعانىس مينيسترلىگى تاراپىنان قازا تاپقانداردىڭ وتباسى مەن جاقىندارىنا جاردەم ەتەتىنىن ايتتى.
ءوڭىر باسشىسى اماندىق باتالوۆ ەكى وفيتسەرگە قاتىستى قيماس سەزىمىن ءبىلدىردى. ول ەرلان مەن دەنيستى جاقىن تانىپ، ولاردىڭ كاسىبي شەبەرلىگى مەن جاۋاپكەرشىلىگىنە سان رەت ءتانتى بولعانىن اتاپ ءوتتى. اقتىق ساپارعا شىعارىپ سالۋ راسىمىندە ءسوز العانداردىڭ دەنى قازا تاپقانداردىڭ وسى جەكە باس قاسيەتتەرىن تىلگە تيەك ەتتى.
اقتىق ساپارعا شىعارىپ سالۋ راسىمىندە ءبىر مينۋت ۇنسىزدىك جاريالانىپ، تابىتتارىنا جابىلعان كوك بايراق قازا تاپقانداردىڭ جەسىرلەرىنە تابىس ەتىلدى.
ەرلان ناۋانوۆتىڭ دەنەسى تالدىقورعان زيراتىندا جەر قوينىنا تاپسىرىلدى. ال، دەنيس گوربۋنوۆتىڭ مۇردەسىن ءوزىنىڭ تۋعان جەرى قوستاناي وبلىسىنا ارنايى رەيسپەن الىپ كەتتى.
