انا ءتىلىڭنىڭ قايتالانبايتىن قۇدىرەتى مەن عاجايىپ اۋەزىن وزگە جۇرتتا جۇرگەندە تەرەڭىرەك تۇسىنەسىڭ
مينسك قالاسىندا قازاق تىلىنە ارنالعان كەش ءوتتى.
وعان بەلارۋس ەلىندەگى قازاق دياسپوراسى، قوعام قايراتكەرلەرى، ستۋدەنتتەر جانە ديپلوماتتار مەن حالىقارالىق ۇيىم وكىلدەرى قاتىستى. ءبىزدىڭ ەلشىلىك قازاقستاننىڭ مەملەكەتتىك ءتىلى، تاريحى جانە مادەنيەتى مەن تۇرمىس-سالتىن دارىپتەۋ ماقساتىندا بايقاۋ وتكىزدى.
انا ءتىلىڭنىڭ قايتالانبايتىن قۇدىرەتى مەن عاجايىپ اۋەزىن وزگە جۇرتتا جۇرگەندە تەرەڭىرەك تۇسىنەسىڭ.
مۇنى بەلارۋس ەلىندەگى قازاق دياسپورانىڭ وكىلدەرى ايتادى. سوندىقتان مۇنداي كەشتەر ەرەكشە اسەرگە بولەيدى. قازاقستانداعى ءتىل ساياساتى كەلىستى الەۋمەتتىك تىلدىك ورتا قالىپتاستىرىپ، حالىقتى تۇتاستىرۋشى كۇشكە اينالىپ كەلەدى.
مينسكىدەگى قازاقستان ەلشىلىگى دە وسى باعىتتا ەڭبەك ەتۋدە.
ەرعالي بولەگەنوۆ، ق ر بەلارۋستاعى توتەنشە جانە وكىلەتتى ەلشىسى:
- ەلشىلىكتىڭ قىزمەتكەرلەرى وزدەرىنىڭ جانۇيالارىمەن، دياسپورا وكىلدەرى جانە ستۋدەنتتەرمەن بىرگە ءتىل مەرەكەسىن اتاپ ءوتتى. ءبىز ءتىلىمىزدىڭ قۇرمەتتەسەك، ەلىمىزدى قۇرمەتتەيمىز. ءتىل مەرەكەسى قۇتتى بولسىن!
مۇندا ديپلوماتتاردىڭ بەلارۋس ەلىندە دۇنيەگە كەلگەن قىزدارى بار. ولاردىڭ انا ءتىلىنىڭ ءالديىن سەزىنۋ ءۇشىن بارلىق جاعداي جاسالعان. ايتپەسە، اتاجۇرتتان شالعايدا تۋعان سابيلەرگە قازاق ءتىلىنىڭ اۋەزدى ءۇنى اۋاداي قاجەت ەكەنى ءسوزسىز. ەلشىلىك ۇيدە دە، جۇمىستا دا تىلدىك ورتا قالىپتاستىرۋعا بارىن سالعان.
گۇلميرا مۇقانوۆا، قازاق ءتىلى ءپانىنىڭ مۇعالىمى:
- ديپلوماتتاردىڭ بالالارى ءبارى قازاقشا بىلەدى. الايدا ءبىزدىڭ ماقساتىمىز - سول انا تىلدەرىنىڭ تۇڭعيىعىن تەرەڭ ءتۇسىنىپ، حالقىمىزدىڭ سالت-ءداستۇرى مەن تاريحىن ۇيرەتۋ. جاس جەتكىنشەكتەر ۇلتتىق بولمىس بىتىمدەرىن وسىنداعى بەلارۋس حالقىنىڭ تاريحىمەن سالىستىرا وتىرىپ، كەيبىر تۇستا ۇقساستىقتار دا تاۋىپ جاتادى.
مۇندا قازاق ءتىلىن مەڭگەرۋگە دەگەن قۇمارلىق كۇن ساناپ ارتىپ كەلەدى. ال قازاقستاندىقتار قايدا جۇرسە دە مەملەكەتتىك ءتىلدىڭ بولاشاعىنا جاۋاپتى ەكەندىكتەرىن سەزىنىپ، ونىڭ مارتەبەسىن ارتتىرۋعا بىرلەسىپ كۇش سالۋدا.
24.kz
