ەلىمىزدە ەڭ ۇزدىك استىق ەكسپورتتاۋشى كاسىپورىن انىقتالدى

استانا. قازاقپارات - قوستاناي وبلىسىنداعى «قاراسۋ» شارۋاشىلىعى ەلىمىزدەگى ەڭ ۇزدىك استىق ەكسپورتتاۋشى كاسىپورىن دەپ تانىلدى.

ۇلتتىق بيزنەس رەيتينگ ساراپشىلارى وسىنداي قورىتىندىعا كەلگەن. بىلتىر شەتەلدەرگە 500 مىڭ تونناعا جۋىق بيداي وتكىزگەن شارۋاشىلىق بيىل دا سول مەجەدەن كەم تۇسپەيمىز دەپ وتىر. اۋا رايىنىڭ قولايسىزدىعىنا قاراماستان قاراسۋلىق ديقاندار ەل ىرىسىن ىسىراپسىز جيناپ الۋعا كۇش سالۋدا.

ۇلتتىق بيزنەس-رەيتينگ ۇيىمى «يمپورت-ەكسپورت» وردەنى، «كاسىبي سالاعا قوسقان زور ۇلەسى ءۇشىن» مەدالى سياقتى ماراپاتتار تاعايىنداعان بولاتىن.

تاۋەلسىز ساراپشىلاردىڭ باعالاۋىنىڭ قورىتىندىسىندا «قاراسۋ» شاراۋشىلىعى استىق ەكسپورتىندا ۇزدىكتەردىڭ قاراتىنان كورىندى. «قاراسۋ» شارۋاشىلىعى بيىلدا مول استىق الۋدان ءۇمىتتى. بۇگىنگى كۇنگە دەيىن 22 مىڭ گەكتار القاپتىڭ جارتىسى جينالىپ الىنعان. گەكتار بەرەكەلى، ازىرگە 14-15 تسەنتنەردەن اينالۋدا. ءتۇسىم ودان دا جوعارى بولۋ ءتيىس. ويتكەنى، بيدايى بىتىك ەگىنگە ءالى كومباين تۇسكەن جوق. ىلعال مول بولعاندىقتان كەي القاپ ءالى كۇنگە كوك كۇيىندە. بيىل ۇكىمەت بەلگىلەگەن باعا ديقانداردىڭ كوڭىلىنەن شىعىپ وتىر. «ازىق-تۇلىك» كورپوراتسياسى بيداي تونناسىن 35-37 مىڭ تەنگەدەن ساتىپ الماق . ال ەندى سىرتقى نارىقتا ودان دا قىمبات بولارى ءسوزسىز.

24.kz