قاراعاندىدا وتكەن ءدۇبىرلى ايتىس مارەگە جەتتى - فوتو
ايتىستىڭ العاشقى جۇپتارى تىلەگەن ءادىلوۆ پەن مۇرادىم ميرلانوۆ، جانداربەك بۇلعاقوۆ پەن اسەت دۇيسەباي، ديدار قاميەۆ پەن ەرجەڭىس ابديەۆ، سارا توقتامىسوۆا مەن ورازبەك قيىنبايەۆ، ايتباي جۇماعۇلوۆ پەن جاقسىلىق ورىنباسار بولىپ باستالعان ەدى.
ەلباسىنىڭ ەڭبەك جولى باستالعان جەرىندە، سەيفوللانىڭ ساكەنى تۋعان دالاسىندا، دوسكەي، تايجان، شاشۋباي، ماديلەردىڭ انگە بولەگەن ولكەسىندە وتكەن ايتىس كورەرمەندەردىڭ ەسىندە قالارلىقتاي بولدى.
ايتىستى جۇرگىزىپ باستاعان ايتىسكەر اقىن سەرىكزات دۇيسەنعازىنىڭ:
ارمىسىڭ، قازىنالى قاراعاندىم،
كوگىنەن شۋاق شاشىپ، تاراعان كۇن.
تورىڭە دۇبىرلەتىپ ايتىس كەلدى،
قالدىرعان اردا ونەرى بابالاردىڭ.
سەكسەن جىلدىق تويلارىڭ قۇتتى بولسىن،
بۇل دا ءبىر بيىگىڭ دەپ باعالارمىن.
ونەگەلى ءسوزى مەن ءىزى قالعان،
بۇحار مەن قازىبەكتەي دانالاردىڭ.
سەيفوللانىڭ ساكەنى تۋعان دالا،
كەلۋگە قۇمار بولعان ساعان اركىم.
دوسكەي، تايجان، شاشۋباي، ماديلەرىم،
قۇلاقتان كەتپەس ءسىرا، ءانى ولاردىڭ.
قازاقى قارا سوزگە دەس بەرمەگەن،
قاسىم مەن عابيدەندەي قارا ناردىڭ.
ەلەۋلى ەڭبەك جولى باستالعان جەر،
ەلباسى نۇرسۇلتانداي نار اعامنىڭ.
وسىنداي قۇتتى ولكەدە ءومىر ءسۇرۋ،
جازىلماس ماڭدايىنا ءار ادامنىڭ.
جاساي بەر، سارى ارقامنىڭ سالقىن ءتورى،
مەكەنى دانالار مەن دارالاردىڭ! - دەپ باستاعان اعىندى جىرىن ءبىرىنشى جۇپقا شىققان تىلەگەن ءادىلوۆ پەن مۇرادىم ميرلانوۆ ەكپىندەتە ءىلىپ اكەتتى. قاشان بارساڭ قاراشايعا شولدەپ وتىراتىن قارت سەكىلدى، حالىقتىڭ قاشاندا ايتىسقا سۋساپ وتىراتىنىنا تاعى ءبىر كوز جەتكىزدىك.
ايتىس بارىسىندا ءار جۇپتىڭ اعىنداتىپ ايتىپ جاتقانىنىنان قۇلاعىمىز قارماپ ۇلگەرگەنىن ۋاقىتىندا جازىپ وتىرۋعا تىرىستىق. ايتىس ۇستىنەن فوتو، ءماتىن، ءتىپتى بەينەماتەريال دا جىبەرىپ وتىردىق. بۇيىرسا الدا ايتىستى تولىق تالقىلاپ، اۋديو، بەينە نۇسقالارىن ۇسىناتىن بولامىز.
قازىرشە، ايتىس قورىتىندىسىن ايتايىق.
ايتىسقا قاتىسقان بارلىق اقىنعا 250000 تەڭگەدەن سىيلىق بەرىلدى.
ءۇشىنشى ورىن - ايتباي جۇماعۇلوۆ پەن اسەت دۇيسەباي (500000 تەڭگەدەن)
ەكىنشى ورىن - جاقسىلىق ورىنباسار (750000 تەڭگە)
ءبىرىنشى ورىن - سارا توقتامىسوۆا (1000000 تەڭگە)
باس جۇلدە - جانداربەك بۇلعاقوۆ! (1500000 تەڭگە)
ۇلاربەك نۇرعالىم ۇلى،
