وزگە ەلدىڭ جاستارى قازاق ءتىلىن مەڭگەرۋدە
ومبى جاستارىن ۇلى ابايدىڭ تىلىنە ۇيرەتىپ جۇرگەن پاۆلودارلىق ورەن وسىلاي دەپ ەسەپتەيدى.
رەسەيلىك دوستارى ماكە دەپ بىلەتىن ماكسيم سپوتكايدىڭ قازىر كومەكشىلەرى كوپ. جوبا اينالاسىندا توپتاسقان قىز-جىگىتتەر ءالىپتى تانۋدىڭ وزگەشە ءتۇرىن مەڭگەرۋدە.
ومبىنىڭ قاق ورتاسىندا ورنالاسقان مادەنيەت ءۇيى قازاق ءتىلى مەن مادەنيەتى جاناشىرلارىنىڭ وشاعى ىسپەتتى. رەسەيلىك ءتۇرلى ۇلت وكىلدەرىنەن قۇرالعان شىعارماشىل جاستار وزگەشە ادىستەر ويلاستىرىپ، قازاق ءتىلىن مەڭگەرۋدە. ماسەلەن، سەرج ەسىمدى كونگو ەلىنىڭ تۋماسى «شوفەردىڭ ءانىن» جاتتاپ العان.
دايىندىق سايىن ناقىشىنا كەلتىرىپ ورىنداۋعا تىرىسادى. ساحنا تورىندە قازاقشا ءان شىرقاۋىنا قازاقستانعا دەگەن ماحابباتى سەبەپ بولعان. ايبىندى استانانىڭ اسەمدىگى تۋرالى تالاي ەستىگەن قارا جىگىتتىڭ قازاقشاسى ازىرگە ءتىلاشار دەڭگەيىندە.
دەگەنمەن، تالابى زور. ماكسيم سپوتكاي وسىنداعى قىز-جىگىتتەردىڭ باسىن قوسىپ، ءتىل كۋرستارىن ۇيىمداستىردى، كەيىن سالت-ءداستۇر مەن اندەردى ۇيرەتە باستادى.
ءتىپتى، 20 شاقتى بەينەروليك دە ءتۇسىرىپ ۇلگەرگەن.
ۆاسيلي رەبيكين، رەجيسسەر:
- ءبىز «قازاقشا سويلە» اتتى العاشقى روليگىمىزدى تۇسىردىك. الەۋمەتتىك جەلىلەردە ونەرىمىزدى باعالاپ، تىلەك ءبىلدىرىپ جاتقاندار از ەمەس. ماكسيمنىڭ دارىستەرىنەن كەيىن، ءبىرشاما ءسوزدى جادىما ساقتاپ، قوس قولداپ امانداسۋدى دا ۇيرەندىم.
رەگينا ۆيزنەر، ومبى قالاسىنىڭ تۇرعىنى:
- ماعان قازاق ءتىلى، قازاق مادەنيەتى ۇنايدى، سوندىقتان مەن وسىندا كەلدىم.
قازاق ءتىلىنىڭ كوسەگەسىن كوگەرتىپ جۇرگەن ماكسيم مەن جەنيانى جەرگىلىكتى جۇرت ماكە مەن جاكە دەپ بىلەدى. سۇيىكتى ىستەرىنەن ءناپاقا تاۋىپ جۇرگەن جاستاردىڭ مۇددەسى ايقىن.
ماكسيم سپوتكاي، جوبا ۇيىمداستىرۋشىسى:
- جالپى، قازاق ءتىلى، قازاق مادەنيەتى، قازاقتىڭ سالت-داستۇرلەرى، وتە قىزىق. تەك قانا قازاقتارعا ەمەس، ول جالپى وزگە ۇلتتارعا، رەسەيدە تۇراتىن بارلىق حالىقتارعا قازاقتىڭ سالت-داستۇرلەرى قىزىق دەپ ويلايمىن.
تاياۋدا تالاپتى ۇيىمداستىرۋشىلاردىڭ «زامانداس» اتتى باسىلىمدارى جارىققا شىعادى. ازىرگە، رەداكسيا ماكسيم جالداپ تۇراتىن پاتەردە ورنالاسقان. ولار بولاشاقتا لايىقتى جۇمىس بولمەسى بۇيىرادى دەگەن ۇمىتتە.
24.kz
