ايداھار باستى قايىقتار فەستيۆالى وتۋدە
سەبەبى، شارانىڭ ءوزى ىزگى ماقساتقا نەگىزدەلگەن. تۇسكەن قاراجات ناۋقاستاردىڭ ەمىنە جۇمسالادى. كانادا جەرىنە قىتايلىقتار اكەلگەن جارىس ۋاقىت وتە كەلە كەڭىنەن اتالىپ وتىلەتىن ۇلكەن سالتاناتتى شاراعا اينالعان. كاناداداعى ايداھار باستى قايىقتار فەستيۆالىنىڭ اياسى ۋاقىت وتكەن سايىن كەڭەيىپ كەلەدى.
وندا قىتاي ايداھارى، ءۇندىنىڭ قايىعى جانە كانادالىقتاردىڭ جەڭىسكە دەگەن قۇشتارلىعى، قۇلشىنىسى جاتىر. فەستيۆالعا مەكتەپ وقۋشىلارى مەن ستۋدەنتتەردەن باستاپ ءىرى كومپانيالاردىڭ قىزمەتكەرلەرى دە قاتىسادى. فەستيۆالعا قاتىسۋشىلاردان قاتەرلى ىسىك اۋرۋىمەن كۇرەس قورىنا جىل سايىن قوماقتى قارجى ءتۇسىپ تۇرادى.
ال ونكولوگيالىق اۋرۋلاردى ەمدەۋگە اقشالاي كومەك كورسەتىپ كەلگەن ءاربىر قاتىسۋشىعا ۇيىمداستىرۋشىلار تاراپىنان ەرەكشە سىيلىقتار تابىس ەتىلەدى. فەستيۆال تورونتو، وتتاۆا، ۆانكۋۆەر، ۆيننيپەگ سياقتى ءىرى قالالاردا ۇيىمداستىرىلىپ ءجۇر. وسىلايشا ونىڭ اۋقىمى جىلدان جىلعا ۇلعايىپ كەلەدى.
جارىسقا قاتىسامىن دەۋشىلەردىڭ دە قاتارى كوبەيە تۇسۋدە. ءاربىر 12 مەترلىك قايىقتا 22 ادام وتىرادى. ەسكەكشىلەر ءوزارا ءتۇسىنىسىپ، شيراق قيمىلداسا، مىندەتتى تۇردە جەڭىسكە جەتەدى. بالالار اراسىنداعى قاتەرلى ىسىك اۋرۋىمەن كۇرەسكە دە وسىنداي ۇيلەسىمدىلىك اسا قاجەت. ول تەك عالىمدار مەن دارىگەرلەردىڭ جۇمىسى ەمەس، بۇعان ادامزات بالاسى ءبىر جەڭنەن قول، ءبىر جاعادان باس شىعارىپ، جۇمىلا اتسالىسۋى قاجەت.
اۆتورلارى: تايا رتيشيەۆا، ارداق ايبار ۇلى، يگور يلين
