كاسپي ماڭى مەملەكەتتەرىنىڭ جاستارى استراحانداعى سامميتتە كاسىپكەرلىك ماسەلەسىن ورتاعا سالادى
سامميتتە جاستار جەتەكشىلەرى كاسىپكەرلىك، جۋرناليستيكا، كاسپي تەڭىزىنىڭ ەكولوگياسى، سونداي-اق ىنتىماقتاستىق پەن ستۋدەنتتىك مادەني الماسۋ ماسەلەلەرىن تالقىلاماق.
شاراعا جاستاردىڭ كوممەرتسيالىق ەمەس ۇيىمدارى، ستۋدەنتتىك وداقتار مەن قاۋىمداستىقتاردىڭ جەتەكشىلەرى، سونىمەن بىرگە مەملەكەتتىك جاستار ساياساتىمەن اينالىساتىن اتقارۋشى بيلىك ورگاندارىنىڭ وكىلدەرى قاتىسادى.
سامميتكە قاتىسۋشىلار جاستار ىنتىماقتاستىق جونىندە قارار قابىلداپ، ونى ۇلتتىق دەلەگاتسيالاردىڭ جوعارعى باسشىلىعىنا تاپسىرادى. سونداي-اق، جيىن بارىسىندا كاسپي ايماعىنىڭ جاستار قاۋىمداستىعىن قۇرۋ جوسپارلانىپ وتىر.
ەسكە سالا كەتەيىك، 2003-جىلى قاراشادا كاسپي ماڭى مەملەكەتتەرى (ازەربايجان، قازاقستان، رەسەي، تۇركىمەنستان جانە يران) كاسپي تەڭىزىنىڭ الابىن قورعاۋ جونىندەگى نەگىزدەمەلىك كونۆەنتسياعا قول قويعان بولاتىن.
1998-جىلى شىلدەدە قازاقستان مەن رەسەي تەڭىز قايراڭىن پايدالانۋعا ەگەمەندىك قۇقىقتارىن جۇزەگە اسىرۋ ماقساتىندا كاسپي تەڭىزىنىڭ سولتۇستىك بولىگىن مەجەلەۋ تۋرالى كەلىسىمگە، ال 2002-جىلعى مامىردا - وسى كەلىسىمگە حاتتاماعا قول قويعان بولاتىن. كەيىننەن بۇل كەلىسىمگە ازەربايجان دا قوسىلدى.
