استانا قالاسىنىڭ اكىمى حالىق ءۇشىن ازىق-تۇلىك الۋدان باس تارتتى

استانا. قازاقپارات - ەلوردا اكىمى يمانعالي تاسماعامبەتوۆ حالىق ءۇشىن جارمەڭكەدەن ازىق-تۇلىك الۋدان باس تارتتى. قالا باسشىسى بۇل تۋرالى بۇگىن ەلوردانىڭ ورتالىق الاڭىندا ءوتىپ جاتقان پاۆلودار مەن جامبىل وبلىسى اۋىل شارۋاشىلىعى ونىمدەرىنىڭ جارمەڭكەسىن ارالاپ شىققاننان كەيىن ب ا ق وكىلدەرىنە ايتتى.

«ارينە، جارمەڭكەنى ارالاپ شىققاننان كەيىن كوز قىزىقتىراتىن دۇنيەنىڭ كوپ ەكەندىگىن بايقايسىڭ. ءبىراق، بۇل جارمەڭكە ەڭ الدىمەن ەل ءۇشىن، حالىق ءۇشىن ۇيىمداستىرىلعاننان كەيىن حالىقتىڭ العانى ءجون عوي دەپ ەسەپتەيمىن»، - دەدى ي. تاسماعامبەتوۆ ب ا ق وكىلدەرىنىڭ «وسى جارمەڭكەدەن ازىق-تۇلىك الاسىز با؟»، دەگەن ساۋالىنا وراي.

ايتا كەتەيىك، ەلورداداعى جارمەڭكەگە پاۆلودار وبلىسىنىڭ اقتوعاي، باياناۋىل، جەزدى، ەرتىس، قاشىر، شارباقتى سىندى 10 اۋدانى مەن پاۆلودار، ەكىباستۇز جانە اقسۋ قالالارىنىڭ كاسىپورىندارى قاتىسۋدا. ولار جالپى كولەمى 750 توننانى قۇرايتىن ءونىم اكەلگەن.

ونىڭ ىشىندە 52 توننا ەت جانە ەت ونىمدەرى، 25 توننا ءسۇت ونىمدەرى، 90 مىڭ جۇمىرتقا، 300 توننا كارتوپ، 190 توننا كوكونىس، 18 توننا وسىمدىك مايى، 3 توننا بال سىندى ونىمدەر بار.

ال جامبىل وبلىسىنان قورداي، مەركى، شۋ، تۇرار رىسقۇلوۆ، بايزاق، جۋالى، قورداي، تالاس جانە باسقا دا اۋدانداردىڭ اۋىل شارۋاشىلىعى ونىمدەرىن وندىرۋشىلەرى كەلىپ وتىر. اكەلگەن ازىق-تۇلىگىنىڭ كولەمى - 190 توننا. ونىڭ 35 تونناسىن ەت جانە ەت ونىمدەرى، 12 تونناسىن ءسۇت ونىمدەرى، 31 تونناسىن كارتوپ، 51 تونناسىن باقشا ونىمدەرى، 2 تونناسىن بال قۇرايدى.

اۆتور: مارلان جيەمباي