قاراعاندى وبلىسىندا بالالار مىنگەن اۆتوبۋسقا شابۋىل جاسالدى
26- قىركۇيەك كۇنى تاڭەرتەڭ قاراعاندى-ساران تاس جولىندا 25-30 جاس ارالىعىنداعى بەس ەر ادام Mercedes Benz اۆتوكولىگىمەن اتالمىش مەكتەپتىڭ جۇرگىزۋشىسى باسقارىپ كەلە جاتقان تارز اۆتوبۋسىن جانە 25 جاستاعى جاتتىقتىرۋشى جۇرگىزىپ كەلە جاتقان ۆاز-21043 اۆتوكولىگىن ءماجبۇرلى تۇردە توقتاتقان.
«ولار ۆاز-دىڭ ىشىندە وتىرعان ءۇش جاتتىقتىرۋشىنى كولىكتەن شىعارىپ الىپ، ساباپ، جاراقاتتاعىش پيستولەتپەن قورقىتقان. سودان كەيىن ولار بوي تاسالاپ قاشىپ كەتكەن. اۆتوبۋستا وتىرعان 10 مەن 17 جاس ارالىعىنداعى 15 بالا وسى شابۋىلدىڭ كۋاگەرى بولدى»، - دەپ حابارلايدى قاراعاندى وبلىستىق ءى ءى د-ءنىڭ باسپا ءسوز قىزمەتى.
جابىرلەنگەن جاتتىقتىرۋشىلار تاپ سول جەردە شابۋىل جاسالعانى تۋرالى وبلىستىق ءى ءى د جەدەل باسقارۋ ورتالىعىنىڭ كەزەكشى بولىمىنە حابارلاسقان. قاراعاندى ءى ءى ب جول-پاترۋلدىك پوليتسياسى پولكىنىڭ قىزمەتكەرلەرى «ۇستاۋ» جوسپارىن قۇرىپ، قالا كوشەلەرىنىڭ بىرىندە كەتىپ بارا جاتقان Mercedes Benz كولىگىن توقتاتقان. وسىلايشا ولاردىڭ بەسەۋى دە قولعا ءتۇسىپ، جاراقاتتاعىش پيستولەت تاركىلەندى. ەندى ولاردىڭ ۇستىنەن «قارۋ قولدانۋ ارقىلى بۇزاقىلىق جاسادى» دەگەن باپ بويىنشا قىلمىستىق ءىس قوزعالدى. تەرگەۋ امالدارى جۇرگىزىلۋدە.
