بۇگىن الماتىدا ادەبيەت سۇيەر قاۋىم تالاسبەك اسەمقۇلوۆتى اقتىق ساپارعا شىعارىپ سالدى
شاكەن ايمانوۆ اتىنداعى «قازاق فيلم» كينوستۋدياسىنىڭ اۋلاسىندا وتكەن جانازاعا جازۋشىنىڭ تۋعان- تۋىستارى، ۇزەڭگىلەس دوستارى، باسقا دا اقىن- جازۋشىلار، ونەر سالاسىندا جۇرگەن ازاماتتار جينالىپ، مارقۇمنىڭ وتباسىنا كوڭىل ايتىپ، ورنى تولماس قايعىعا ورتاقتاستى.
قارالى جيىندا ءسوز سويلەگەندەر تالاسبەك اعانىڭ ءومىرى مەن شىعارماشىلىعى، ادامگەرشىلىك قاسيەتتەرى جايىندا شەر تارقاتتى.
«قازاق رۋحانياتى قارا جامىلدى. تالاسبەك اعامىز ۇلتقا كەرەك رۋحاني بايلىقتى وزىمەن بىرگە اكەتىپ بارادى. تالاسبەك اعانىڭ شىعارمالارى ادەبيەتىمىزدىڭ مول قازىناسى ەدى. ۋاقىت وتكەن سايىن ولاردىڭ باعاسى دا ارتا تۇسەرى انىق. قازاق ۇلتى باردا تالاسبەك اعانىڭ شىعارمالارى ماڭگى جاساي بەرەدى. سسەناريىن ءوزى جازعان «ءبىرجان سال» فيلمىنىڭ كۇللى قازاقتىڭ ءسۇيىپ كورەر كينوسىنا اينالعانى بۇعان دالەل. قۇداي عۇمىر بەرگەندە دوسحان اعانىڭ قاسىندا ءجۇرىپ ءالى تالاي دۇنيەلەر جازار ەدى. قالامى دا، دومبىراسى دا جورعا ەدى. امال قانشا، بۇيىرماعان ەكەن. شەرتپە كۇيدەي شەرلى ءومىر كۇتپەگەن جەردەن ارامىزدان الىپ كەتتى. ءبىراق تالاسبەك اعانىڭ مۇرالارى ماڭگى جاساي بەرەدى»، - دەدى ءوز سوزىندە اقىن، قازاقستان جازۋشىلار وداعى باسقارماسى ءتوراعاسىنىڭ ورىنباسارى مارالتاي رايىمبەك ۇلى.
ال اقتوبەدەن كەلگەن اقىن مەيىرحان اقداۋلەت تالاسبەك اسەمقۇلوۆتىڭ قازاسىنا بۇكىل قازاقتىڭ قابىرعاسى قايىسىپ وتىرعانىن ايتتى.
«قازاق ونەرىندە، ادەبيەت سالاسىندا، قازاق ينتەليگەنتسياسىنىڭ ىشىندە جان- جاقتى ءبىلىمدى، بۇكىل دۇنيە ءجۇزىنىڭ عىلىمى مەن ىلىمىنەن حاباردار، ءوزىنىڭ تابيعي بىلىكتىلىگىمەن ەرەكشەلەنەتىن بەس- التى ادام بولعان بولسا، سولاردىڭ ءبىرى تالاسبەك ەدى. ول جۇرەگىمەن ءومىر ءسۇردى، جۇرەگىمەن قىزمەت ەتتى. بويىندا قۋلىعى جوق، جانى جايساڭ جان ەدى. تالاسبەكتىڭ قادىرى ەندى ارتادى. ارتى قايىرلى بولسىن»، - دەدى م. اقداۋلەت.
ءوز كەزەگىندە مادەنيەتتانۋشى- عالىم، قوعام قايراتكەرى مۇرات اۋەزوۆ ءوزىنىڭ تالاسبەك اسەمقۇلوۆپەن دوستىعىن، سىيلاستىعىن ءوز ومىرىندەگى ۇلكەن ولجا ەكەندىگىن جەتكىزدى.
«تالاسبەكتىڭ قازاسى بۇكىل قازاق ءۇشىن ۇلكەن تراگەديا. ول ەرەكشە دارىندى تۇلعا ەدى. كۇيشى دەسەڭ كۇيشى، ويشىل دەسەڭ ويشىل، جازۋشى، درامتۋرگ ەدى. جۇرەگى حالىق دەپ سوعاتىن. ماعان ونىمەن سىرلاسۋ، اڭگىمەلەسۋ باقىتى بۇيىرعان ەكەن. ەندى تالاسبەكتىڭ زەرتتەۋلەرى، جازعان دۇنيەلەرى ماڭگىلىك حالىق جادىندا ساقتالادى. ويتكەنى ولار قازاق ءۇشىن وتە قۇندى مۇرالار»، - دەدى مۇرات اۋەزوۆ.
قارالى جيىننان كەيىن دۇعا وقىلدى. مارقۇم كەڭساي زيراتىنا جەرلەندى.
اۆتور: جاپپاربەرگەن ايبوتا
