شاقپا ءتىلدى ر. شاقۋدىڭ «ءسوز جەبەسى» وقىرماندارعا جول تارتتى
جالپاقتال وڭىرىندە ات جالىن تارتىپ ءمىنىپ، ءال-فارابي اتىنداعى قازاق ۇلتتىق ۋنيۆەرسيتەتىنىڭ جۋرناليستيكا فاكۋلتەتىن بىتىرگەن راشيد 1993-جىلدان باتىس قازاقستان وبلىستىق تەلەراديوسىندا قىزمەت اتقارىپ، وبلىستىق راديونىڭ اعا رەداكتورلىعىنا دەيىن كوتەرىلدى. راديو جۋرناليستيكانىڭ قىر-سىرىن قالتقىسىز مەڭگەرىپ قانا قويماي، ساتيرالىق تۋىندىلار جازىپ، «شاقپا ءتىلدى شاقۋ» اتاندى. ونىڭ ساتيرالىق ولەڭدەرى قوعامداعى ءتۇرلى كەلەڭسىزدىكتەردى ورىندى تۇيرەيدى، شىمشىمالارىنان دوكەيلەرگە دەيىن تاقتان ءتۇسىپ، كۇيرەيدى. ءازىل اڭگىمەلەرى، تاۋىپ تا قاۋىپ ايتقان سوزدەرىنىڭ ورنى ءبىر توبە. قىسقاسى، قازاق ساتيراسىنا ولجا سالا ءبىلدى. وكىنىشكە قاراي، ءومىر بويى تىرناقتاپ جازعان دۇنيەلەرى كوزى تىرىسىندە جيناق بولىپ جارىق كورمەدى.
«ارىس» باسپاسىنىڭ ديرەكتورى، فيلولوگيا عىلىمدارىنىڭ دوكتورى عاريفوللا انەستىڭ ايتۋىنشا، «ءسوز جەبەسى» ساتيريكتىڭ ومىردەن وزعانىنا ءبىر جىل تولۋىنا وراي شىعارىلىپ وتىر. اقىن ءسوزى ولمەيدى دەگەن وسى. كىتاپتا سونداي-اق راشيد شاقۋدىڭ زامانداستارىنىڭ ەستەلىكتەرى دە بەرىلگەن.
اۆتور: ەلجان ەرالى
