ءۇش جىلدىق ۇزىلىستەن كەيىن «مىسىر ارۋى» بايقاۋى وتەدى

ءابۋ-دابي. قازاقپارات - مىسىردا ءۇش جىلدىق ۇزىلىستەن كەيىن «مىسىر ارۋى» بايقاۋى وتەدى.

بايقاۋ شارم- ەل-شەيح كۋرورتتىق قالاسىندا وتەدى. 18 ۇمىتكەردى توعىز ادامنان قۇرالعان قازىلار القاسى باعالايدى. ونىڭ ىشىندە بۇرىنعى «مىسىر ارۋى» دونيا حامەد پەن مىسىرلىق مودەلەر حاني ءال-بەحەيري بار.

ۇيىمداستىرۋ كوميتەتىنىڭ ءتوراعاسى كاريم حۋسەين 2011-جىلى كوتەرىلىستەن كەيىن بايقاۋدى وتكىزۋدى توقتاتۋعا ءماجبۇر بولعانىن ايتتى. ونىمەن قوسا «اعايىندى مۇسىلماندار» ءدىني ۇيىمى مۇنداي شوۋلاردى قۇپتاماعان.

بايقاۋدىڭ باس ۇيىمداستىرۋشىسى جانە قازىلار القاسىنىڭ ءتوراعاسى يۋسەد سپاحي سۇلۋلارعا قويىلاتىن تالاپتار كۇشەيتىلەتىنىن ايتتى. ونىڭ سوزىنە قاراعاندا، قىزداردىڭ سىرتقى سۇلۋلىعىمەن بىرگە، ولاردىڭ ءبىلىمى، مىسىر مادەنيەتى مەن مۇراسىن ءبىلۋ دەڭگەيى دە باعالانادى. جەڭىمپاز بىرنەشە ءتىلدى ءبىلۋى ءتيىس، دەيدى ۇيىمداستىرۋشىلار.

بايقاۋ جەڭىمپازى «الەم ارۋى»، «جەر ارۋى» جانە «جەر ءجۇزىنىڭ ارۋى» بايقاۋلارىندا ەل نامىسىن قورعايدى. سونىمەن قاتار وعان قۇندى سىيلىقتار، ونىڭ ىشىندە اۆتوموبيل مەن زەرگەرلىك بۇيىمدار تارتۋ ەتىلەدى.