قوستانايلىق قوس زەرگەر روبوت جاساپ شىعاردى
ولار تۋىندىعا اۋىل شارۋاشىلىق تەحنيكالارىنىڭ ەسكى بولشەكتەرىن پايدالانعان. قولونەر شەبەرلەرى الىپ قۇلتەمىردى ءۇش اي بويى قۇراستىرعان. تەمىردەن ءتۇيىن تۇيگەن اكەلى-بالالى ۇستالاردىڭ الداعى ۋاقىتتا كورمە ۇيىمداستىرۋ جوسپارى دا بار.
قوستانايلىق قولونەر شەبەرلەرى جاساعان «الىپ ادامنىڭ» بيىكتىگى - 3 مەتر، ال سالماعى 2 تونناعا جۋىق. شويىن تۋىندىنى قۇراستىرىپ شىعارۋ ءۇشىن ولار كوبىنەسە، اۋىل شارۋاشىلىق تەحنيكاسىنىڭ قوسالقى بولشەكتەرىن قولدانعان.
اكەلى-بالالى سابىر مەن مارلەن اۋەلى قالاداعى تەمىر قابىلداۋ بەكەتتەرىن ارالاپ، وزدەرىنە قاجەت بولشەكتەر ىزدەگەن. قاجەتتى تەتىكتەر تۇگەل تابىلعان سوڭ قۇراستىرۋعا كىرىسەدى. شەبەرلەر شويىن ادامدى جاساپ شىعارۋ ءۇشىن ءجۇز مىڭ تەڭگەدەن استام قاراجاتتارى كەتكەندىگىن ايتتى.
قوستانايلىق ۇستالار تەمىر ءمۇسىن قۇراستىرۋدى ەكى جىل بۇرىن قولعا العان. وسى ۋاقىتقا دەيىن بەس تۋىندى جاساپتى. زەرگەرلەردىڭ كەيبىر تەمىر تۇيىندەرى قالا ورتالىعى مەن ساياباقتارعا قويىلعان.
