موڭعوليادا ەرەكشە كيىز ءۇي جاسالدى

استانا. قازاقپارات - ءىشى-سىرتى تۇگەل ويۋلانعان كيىز ءۇيدى قولونەر شەبەرى قۇماربەك قانجارباي ۇلى بالالارىمەن بىرگە ءۇش اي جاساپتى.

ەر جانىبەكتىڭ بەينەسى سالىنعان ەسىكتى ويۋلاۋعا ءبىر اي ۋاقىت كەتىپتى.

سامىرسىن دەگەن اعاش بولادى. سامىرسىننىڭ ءوزى ويۋعا ارنالعان جاقسى ساپالىلارى بولادى. سامىرسىن ىشىنەن تورتكە بولىنەدى ەكەن. جاساڭ سۋلى جەردىڭ اعاشى بۇعان جارامايدى. بۇل تاستى جەردىڭ اعاشىنان، سامىرسىننىڭ ەڭ قاتتى تۇرىنەن جاسالعان دەيدى شەبەر.

جاقۇت تاستارمەن بەزەندىرىلگەن ەسىكتىڭ تۇتقاسى ەركەك قويدىڭ مۇيىزىنەن ەكەن. ءبارى تابيعي. ۋىققا قازاق ەلىنىڭ كوك تۋىنداعى ويۋدى بەينەلەپتى. كۇمىس جالاتىلعان باعالى مەتال جاپسىرىلعان. كەرەگەگە بايلار تۇسى جەزدەن.


ال قوشقار ءمۇيىز ويۋمەن بەزەندىرىلگەن شاڭىراقتىڭ ديامەترى ەكى مەتر. جاقتاۋىنا سالىنعان جانۋارلار حالىقتىڭ جىل ساناۋىنان حابار بەرەدى. جۇمساق ديۆاندا جاتقان ادامنىڭ ۇيقىسى قاتتى بولادى. ال اعاش توسەكتە جاتقاندار سەرگەك كەلەدى.

ءبىزدىڭ قازاق ازاماتتارى سەرگەك بولۋى كەرەك دەپ ازىلدەگەن شەبەر ۇيرەنۋشىلەر بولسا مارحاببات دەيدى. جاساعان دۇنيەلەرىمدى اتا جۇرتقا اپارىپ كورسەتسەم دەگەن دە ارمانى بار.

Baq.kz