قاراعاندى وبلىسىنىڭ بۇرىنعى اكىمى وزىنە تاعىلعان ايىپتاردىڭ ەشقايسىسىمەن كەلىسپەيتىنىن جەتكىزدى

قاراعاندى. قازاقپارات - قاراعاندى وبلىسىنىڭ ەكس-اكىمى باۋىرجان ابدىشيەۆ وزىنە قىزمەت بابىن اسىرا پايدالاندى دەپ تاعىلىپ وتىرعان ايىپپەن كەلىسپەيتىنىن جەتكىزدى.

«ماعان تاعىلعان ايىپتاردىڭ ەشقايسىسىمەن كەلىسپەيمىن. مەن ءوزىمدى حالىققا ادال قىزمەت ەتكەندەردىڭ قاتارىندامىن دەپ ەسەپتەيمىن. بار كۇش-جىگەرىمدى ءوڭىردىڭ وركەندەۋىنە جۇمسادىم. حالىق ءوزى دۇرىس باعالايدى دەپ ويلايمىن»، - دەدى ب. ابدىشيەۆ سوت وتىرىسىندا.

ايىپتالۋشى ءوزىنىڭ 80 جاستاعى اۋرۋ اناسى جانە كامەلەتكە تولماعان ەكى بالاسى بار ەكەنىن، ونىڭ 11 جاستاعى كەنجەسى قانت ديابەتى اۋرۋىنان زارداپ شەگەتىنىن ايتقان.

«مەندە قاشىپ كەتەتىن وي بولعان جوق. مۇنى قالاسام، وسىعان دەيىن دە ءىزىمدى سۋىتۋعا تالاي مۇمكىندىك بولعان. تەرگەۋ ىسىنە كەدەرگى كەلتىرمەيمىن. سوتتان باس بوستاندىعىمنان ايىرمايتىن سانكسيا بەرۋلەرىڭىزدى سۇرايمىن»، - دەدى ب. ابدىشيەۆ.

ول قالا ورتالىعىنداعى لوبودا كوشەسىندە ورنالاسقان ءۇش بولمەلى پاتەردى كەپىلدىككە ۇسىنا الاتىنىن جەتكىزدى. ايىپتالۋشىنىڭ جانە ونىڭ قورعاۋشىلارىنىڭ ءوتىنىشى بويىنشا سوت وتىرىسى مەملەكەتتىك تىلدە ءوتتى. پروكۋرور ايىپتالۋشىنى قاماۋدا ۇستاۋدى سۇرادى.

بۇرىن حابارلانعانداي، قاراعاندى قالاسى قازىبەك ءبي اۋداندىق سوتى ب. ابدىشيەۆتى 2 ايعا قاماۋ تۋرالى شەشىم شىعاردى. وعان ق ر ق ك 307-بابىنىڭ 4-تارماعىنا سايكەس ايىپ تاعىلدى. كۇدىكتى رەتىندە ب. ابدىشيەۆ 23 - قىركۇيەكتەن 24 - قىركۇيەككە قاراعان ءتۇنى ۇستالدى.

ەسكە سالا كەتەيىك، ب. ابدىشيەۆ قاراعاندى وبلىسىنىڭ اكىمى بولىپ 2013 -جىلدىڭ قاڭتارىندا تاعايىندالعان. 2014 - جىلى ماۋسىم ايىندا قىزمەتىنەن بوساتىلدى. ونىڭ ورنىن نۇرمۇحامبەت ابدىبەكوۆ باستى. وسىعان دەيىن ول اقتوبە وبلىسىنىڭ اكىمنىڭ ءبىرىنشى ورىنباسارى بولعان.