ەلباسى: استانا - ساۋد ارابياسىمەن اراداعى دوستىق قارىم- قاتىناستاردىڭ كورىنىسى

استانا. قازاقپارات - مەملەكەت باسشىسى نۇرسۇلتان نازاربايەۆ ساۋد ارابياسى كورولدىگىنىڭ كونسۋلتاتيۆتىك كەڭەسىنىڭ ءتوراعاسى ابداللا ءال اش- شەيحتى قابىلدادى، دەپ حابارلادى اقوردانىڭ باسپا ءسوز قىزمەتىنەن.

كەزدەسۋ بارىسىندا پارلامەنت ارالىق ىنتىماقتاستىقتىڭ نەگىزگى باعىتتارى تالقىلاندى، سونداي- اق ونى ءارى قاراي دامىتۋ مۇمكىندىكتەرى قاراستىرىلدى.

 نۇرسۇلتان نازاربايەۆ ساۋد ارابياسى قازاقستاننىڭ ماڭىزدى سەرىكتەستەرىنىڭ ءبىرى بولىپ سانالاتىندىعىنا توقتالدى.

- كورولدىك ءبىزدىڭ ەلىمىزگە تاۋەلسىزدىكتىڭ العاشقى كۇندەرىنەن باستاپ ەكىجاقتى ساياسي ءىس- قيمىل تۇرعىسىنان دا، حالىقارالىق ۇيىمدار اياسىنداعى ىنتىماقتاستىق ارقىلى دا قولداۋ كورسەتىپ كەلەدى. ءسىزدىڭ ەلدىڭ كومەگىمەن استانادا ءبىرقاتار عيماراتتار سالىندى، بۇل ءبىزدىڭ ەكى مەملەكەت اراسىنداعى دوستىق قارىم- قاتىناستاردىڭ كورىنىسى بولىپ سانالادى. قازاقستان كورولدىكپەن ءتۇرلى سالالاردا، سونىڭ ىشىندە ساۋدا- ەكونوميكا سالاسىندا ىنتىماقتاستىقتى بۇدان ءارى دامىتۋعا دايىن، - دەدى مەملەكەت باسشىسى.

ءوز كەزەگىندە ابداللا ءال اش- شەيح ەلباسىنىڭ قابىلداۋىنا ريزاشىلىعىن ءبىلدىرىپ، بۇل ونىڭ قازاقستان پرەزيدەنتىمەن ءتورتىنشى رەت كەزدەسۋى ەكەنىن ايتتى. ول ت م د مەملەكەتتەرى ىشىندە ايرىقشا ورىنعا يە ءبىزدىڭ ەلىمىزدىڭ قارقىندى دامۋىنا نازار اۋداردى.

 ساۋد ارابياسى كورولدىگىنىڭ كونسۋلتاتيۆتىك كەڭەسىنىڭ ءتوراعاسى ەكى ەلدىڭ اراسىندا ىنتىماقتاستىقتى كەڭەيتۋگە بولاتىن ءبىرقاتار پەرسپەكتيۆالى سالالاردىڭ بار ەكەنىن دە اتاپ ءوتتى.