سوڭعى ءۇش جىلدا كاسىپتىك-تەحنيكالىق ءبىلىم سالاسىنا باعىتتالعان قاراجات ەكى ەسەگە ارتتى

استانا. قازاقپارات - سوڭعى ءۇش جىلدا ەلىمىزدەگى كاسىپتىك-تەحنيكالىق ءبىلىم بەرۋگە باعىتتالعان بيۋجەت قاراجاتى ەكى ەسەگە ارتىپ وتىر. بۇگىن سەناتتا ورتا تەحنيكالىق جانە كاسىپتىك ءبىلىم بەرۋ جۇيەسىنىڭ بولاشاعىنا ارنالعان عىلىمي-تاجىريبەلىك كونفەرەنتسيا بارىسىندا ءبىلىم جانە عىلىم ءمينيسترى اسلان ءسارىنجىپوۆ وسىلاي ءمالىم ەتتى.

«قازىرگى تاڭدا ەلىمىزدىڭ 850 كوللەجىندە 560 مىڭنان استام ستۋدەنت ءبىلىم الۋدا. جىل سايىن 180 مىڭ تۇلەك ەڭبەك نارىعىنا شىعادى. ولاردىڭ 70 پايىزدان استامى ءبىرىنشى جىلدىڭ ىشىندە ءوز كاسىبى بويىنشا جۇمىسقا ورنالاسادى»، - دەيدى اسلان ءسارىنجىپوۆ.

ونىڭ ايتۋىنشا، سوڭعى جىلدارى قازاقستاندا كادر دايارلاۋ ماسەلەسىن شەشۋ ءۇشىن ءبىلىم سالاسىنا بولىنگەن قاراجات مولشەرى ەداۋىر ارتقان. ماسەلەن، بۇل كورسەتكىش 2014-جىلى 1 تريلليون 497 ميلليارد تەڭگەنى قۇرادى.

«ال سوڭعى ءۇش جىلدا كاسىپتىك-تەحنيكالىق ءبىلىم سالاسىنا باعىتتالعان بيۋجەت قاراجاتى ەكى ەسەگە ارتتى. كوللەجدەردەگى شەبەرحانالاردى جابدىقتاۋعا ارنالعان قاراجات 6 ەسەگە ۇلعايتىلدى. 2014-جىلى 200 دەن استام شەبەرحانا مەن زەرتحانالاردى جابدىقتاۋعا 5,5 ميلليارد تەڭگە قاراستىرىلىپ وتىر»، - دەدى مينيستر.

اۆتور: قانات مامەتقازى ۇلى