اتوم ەلەكتر ستانساسى قايدا سالىناتىنى اتىراۋداعى فورۋمدا شەشىلۋى مۇمكىن

استانا. قازاقپارات - اتوم ەلەكتر ستانساسىنىڭ قۇرىلىسى بويىنشا سوڭعى شەشىم اتىراۋدا قابىلدانۋى مۇمكىن. بۇل تۋرالى بۇگىن ورتالىق كوممۋنيكاتسيالار قىزمەتىندەگى بريفينگتە شىعىس قازاقستان وبلىسىنىڭ اكىمى بەردىبەك ساپاربايەۆ ءمالىم ەتتى.

بريفينگ بارىسىندا «اتوم ەلەكتر ستانساسى كۋرچاتوۆتا سالىنا ما؟» دەگەن ساۋال قويىلدى.

«اتوم ەلەكتر ستانساسىنىڭ قۇرىلىسى ماسەلەسىنە توقتالاتىن بولساق، 30- قىركۇيەكتە اتىراۋدا ق ر پرەزيدەنتى نۇرسۇلتان نازاربايەۆ پەن ر ف پرەزيدەنتى ۆلاديمير پۋتيننىڭ قاتىسۋىمەن وتەتىن قازاقستان مەن رەسەيدىڭ XI ءوڭىرارالىق ىنتىماقتاستىق فورۋمىندا سوڭعى شەشىم قابىلدانادى دەپ ويلايمىن»، - دەدى اكىم.

ونىڭ سوزىنە قاراعاندا، اتالعان ماسەلە بويىنشا سوڭعى كەزدەسۋ ق ر پرەمەر-ءمينيسترى كارىم ءماسىموۆتىڭ قاتىسۋىمەن كۋرچاتوۆ قالاسىندا ءوتىپ، وعان «روساتومپروم» باسشىلىعى دا كەلدى.

«وندا قاجەتتى ماتەريالدار دايارلاۋ ءۇشىن ءتيىستى تاپسىرمالار بەرىلدى. دايىندىق جۇمىستارىنا توقتالاتىن بولساق، ءۇش جەر تەلىمىن ءبولىپ، سۋمەن، قاۋىپسىزدىكپەن قامتاماسىز ەتۋ تۇرعىسىندا ءتيىستى مالىمەتتەردى ۇسىندىق»، - دەدى ب. ساپاربايەۆ.

اۆتور: رۋسلان عابباسوۆ