الماتىدا ەكى گاز ستانساسى اشىلدى

استانا. قازاقپارات - الماتى اكىمى احمەتجان ەسىموۆ قالا مەن قورشاعان ورتانى لاستاۋدى تومەندەتۋ باعدارلاماسى اياسىندا كولىكتى تىعىزدالعان گازبەن قامتاماسىز ەتۋ ماڭىزدى وقيعا ەكەندىگىن جەتكىزدى.

«قازاقستان پرەزيدەنتى نۇرسۇلتان نازاربايەۆتىڭ تاپسىرماسى بويىنشا قالا ەكولوگياسىن جاقسارتۋدا اۋقىمدى شارالار جۇزەگە اسىپ، كولىكتى گازعا كوشىرۋدە ۇلكەن جۇمىستار اتقارىلۋدا. جىل اياعىنا دەيىن گازبەن جۇمىس ىستەيتىن مۋنيتسيپالدى اۆتوبۋستار سانى 600 گە ارتاتىن بولادى، ەكو تاكسيلەر سانى 200 بىرلىكتەن 400 گە جەتەدى» ، - دەدى احمەتجان ەسىموۆ.

قالا اكىمى مەملەكەت باسشىسىنىڭ تاپسىرماسىن ورىنداۋ بارىسىندا جەكە سەكتور كولىكتەرىن گازعا كوشىرۋ بويىنشا ءبىرقاتار ىنتالاندىرۋ شارالارىنىڭ جۇرگىزىلىپ جاتقاندىعىن جەتكىزدى.

«ءبىز «قاز ترانس گاز ونىمدەرىمەن» 4 جىل ىشىندە گازدىڭ باعاسى بەنزين مەن ديزەلدى وتىندارعا قاراعاندا 40 پايىزعا تومەن بولاتىندىعى تۋرالى كەلىسىم جاساعانبىز. ماڭىزدىسى، جەكە سەكتور كولىكتەرىنىڭ گازعا كوشۋى. «الماتى» ا ك ق- دا ميكرو نەسيە بەرەتىن ۇيىم قۇرىلعان، ولار جەكە كولىگىن گازعا اۋىستىرعىسى كەلگەندەردى قارجىلاندىراتىن بولادى»، - دەدى احمەتجان ەسىموۆ.

بۇعان دەيىن قالادا 3 گاز ستانساسى جۇمىس ىستەگەن. ولار مۋنيتسيپالدى (كوممۋنالدى) اۆتوبۋس پاركتەرىن، «الماتى تازالىقتىڭ» ارنايى تەحنيكالارىن، ەكو- تاكسي، تۇلپار تاكسي كولىكتەرىن، جەكە كولىكتەردى گازبەن قامتاماسىز ەتەدى.

 اۆتوموبيلگە ارنالعان گازبەن تولتىرىلعان كومپرەسسورلى ستانسالار حالىقارالىق ستاندارتقا ساي سالىنعان جانە بۇلاردىڭ بارلىعى قاۋىپسىزدىك تالاپتارىنا تولىق جاۋاپ بەرەدى. ستانسا كۇن سايىن 400 بىرلىكتەگى ءىرى اۆتوكولىكتەردى گازبەن قامتاماسىز ەتە الادى.

bnews.kz