قانات يسلامدى قازاقستانعا اكەلگەن باۋىرجان وسپانوۆ قازاقستان بوكس فەدەراتسياسىنىڭ ۆيتسە-پرەزيدەنتى بولدى

الماتى. قازاقپارات- الماتى وبلىسىنىڭ بوكس فەدەراتسياسىنىڭ پرەزيدەنتى باۋىرجان وسپانوۆ قازاقستان بوكس فەدەراتسياسىنىڭ وبلىستىق فەدەراتسيالارمەن جۇمىس ىستەۋ بويىنشا ۆيتسە-پرەزيدەنتى لاۋازىمىنا تاعايىندالدى.

بۇل تۋرالى بۇگىن قازاقستاننىڭ بوكس فەدەراتسياسىنان حابارلادى.

باۋىرجان كەڭەسبەك ۇلى وسپانوۆ 1968-جىلى 12- ناۋرىزدا الماتى وبلىسى اندرەيەۆ اۋدانىنىڭ (قازىرگى الاكول اۋدانىنىڭ قۇرامىنا ەنگىزىلگەن بۇرىنعى ۇيگەنتاس اۋدانى) جىلاندى اۋىلىندا تۋعان. الماتى ەنەرگەتيكا ينستيتۋتىن ءتامامداعان. تەحنيكا عىلىمدارىنىڭ كانديداتى. بەلگىلى قوعام قايراتكەرى، مەتسەنات. ءبىرقاتار ۇكىمەتتىك ماراپاتتارعا يە.

باۋىرجان وسپانوۆ ەكى قىزمەتىن قاتار اتقاراتىن بولادى.

باۋىرجان وسپانوۆ ەلگە كەلگەن كوپتەگەن قانداستارىمىزعا ءبىر كىسىدەي قولداۋ جاساپ، كومەكتەسىپ كەلە جاتقان جانى جومارت ازامات. كەزىندە ول قانات يسلامنىڭ اتا-جۇرتىنا ءبىر جولا كەلۋىنە تىكەلەي سەبەپكەر بولعانىن قانات جۋرناليستەرگە بەرگەن سۇحباتتارىندا ءبىر ەمەس، بىرنەشە رەت ايتقان بولاتىن. باۋىرجان وسپانوۆ ءالى كۇنگە قاناتقا قول ۇشىن بەرىپ كەلەدى. كاسىپقوي بوكسپەن اينالىسۋىنا دا، وسى ايتۋلى ازاماتتىڭ سىڭىرگەن ەڭبەگى ۇشان تەڭىز.

اۆتور: جاپپاربەرگەن ايبوتا