ازيادادا قازاقستان قۇراماسىنىڭ باپكەرلەرى قازاق قىزىن قاساقانا جۇلدەسىز قالدىردى
نەگىزى، جازيرا جاپپارقۇل 69 كەلى سالماق دارەجەسىندە باق سىنايتىن. ال 69 كەلىدەگى قىزدار 24- قىركۇيەك كۇنى سىنعا ءتۇستى. ينچحوندا ءجۇرىپ، «جازيرا 25- قىركۇيەك كۇنى سىنعا تۇسەدى» دەگەندى ەستىپ، تاڭ قالدىق...
سونىمەن كەشە اۋىراتلەتتەر سىنعا تۇسەتىن سپورتتىق كەشەنگە باردىق. بۇل سىنعا تۇسەتىندەر، 75 كەلى سالماقتاعى قىز-كەلىنشەكتەر ەكەندىگىنە ءىس جۇزىندە كوز جەتكىزدىك. 72-75 كەلى تارتاتىن اۋىر سالماقتى قىزدار اراسىندا شىناشاقتاي بولىپ جازيرا ءجۇر. ونىڭ سالماعى - بار بولعانى 69,8 كەلى.
بۇگىن وسى سالماقتا بەس قىز ونەر كورسەتتى. بەسەۋىنىڭ دەڭگەيلەرى تومەن ەكەندىگى بىردەن بايقالدى.
جۇلدەلى ورىندارعا ءتورت قىزدىڭ تالاساتىندىعى بىردەن بەلگىلى بولدى. سولتۇستىك كورەيانىڭ ەكى قىزى مەن قىتاي زىلتەمىرشىسىنىڭ الەۋەتتەرى بىردەن بايقالدى. بىرەۋى وزدەرى تاپسىرىس بەرگەن سالماقتى ءۇش مۇمكىندىگىندە دە كوتەرە الماي، سايىستان شىعىپ قالماسا، جازيرانىڭ جۇلدەگە ىلىگۋى مۇمكىن ەمەس.
الگى ۇشەۋى سالماعى وزدەرىنەن جەڭىل جازيرا تۇرماق، ءبىر-بىرىنە دەس بەرەر ەمەس. سونىمەن، قولا جۇلدە ك ح د ر قىزى يونگ-سيم ريمگە بۇيىرىپ، التىنعا يۋندجۋ كيم (ك ح د ر) جانە يۋە كان (قىتاي) تالاستى. ەكەۋىنىڭ اراسىنداعى باسەكەلەستىكتىڭ شەكتەن تىس قىزعاندىعى سونشالىق، ولار بىرنەشە رەكورد جاڭارتتى دا.
اتاپ ايتقاندا، يۋندجۋ كيم سەرپە كوتەرۋدە 164 كەلىنى ەڭسەرىپ، الەم رەكوردىن، سونىمەن قاتار ازيا جانە ازيا ويىندارى رەكوردتارىن جاڭارتتى. ءارى قوسسايىس قورىتىندىسى بويىنشا 292 كەلىمەن ازيا ويىندارى رەكوردىن وزگەرتتى. ال يۋە كان جۇلقا كوتەرۋدە 131 كەلىمەن ازيا ويىندارى رەكوردىن جاڭعىرتتى. سەرپە كوتەرۋدە الگى رەكوردتار ءۇش مارتە جاڭعىرتىلىپ، باسەكە كورىگى شەكتەن تىس قىزدى.
ءسويتىپ قوسسايىس قورىتىندىسى بويىنشا جۇلدەگەرلەر دە انىقتالدى:
1. يۋندجۋ كيم (ك ح د ر) - 292 (128+164) كەلى
2. يۋە كان (قىتاي) - 291 (131+160) كەلى
3. يونگ-سيم ريم (ك ح د ر) - 271 (118+253) كەلى
4. جازيرا جاپپارقۇل - 263 (118+145) كەلى.
ەندى كەشەگى 69 كەلى سالماق دارەجەسىندە سىنعا تۇسكەن قىزداردىڭ ناتيجەلەرىنە كوز جۇگىرتەيىك:
1. يانمەي سيان (قىتاي) - 268 (118+150) كەلى
2. يۋنحي رە (ك ح د ر) - 262 (121+141) كەلى
3. شيح سۋ حۋانگ (تايپەي) - 233 (108+225) كەلى.
وسى ناتيجەلەرگە قاراساڭىز، جازيرانىڭ بۇگىنگى كورسەتكىشتەرىمەن ءوز سالماعىندا كۇمىس مەدال ولجالاي الاتىندىعىنا كوز جەتكىزۋگە بولادى. ءارى قولا مەدال العان تايپەي سپورتشىسىنىڭ قاراشا ايىنىڭ سوڭىندا 39 عا تولاتىن ارداگەر زىلتەمىرشى ەكەندىگىن دە ايتا كەتكەنىمىز ءجون بولار.
...بۇل قالاي؟ نەگە جانكەشتى جازيرانى جۇلدەدەن ايىردىق؟! نەگە بۇلاي قيانات جاسادىق؟!
كەشە جازيرا جاپپارقۇلدىڭ نەلىكتەن جۇلدەسىز قالعاندىعىن ءبىلۋ ءۇشىن قازاقستان ۇلتتىق قۇراماسىنىڭ باس باپكەرىمەن جولىقتىق.
اۋىر اتلەتيكادان قازاقستان ۇلتتىق قۇراماسىنىڭ باس باپكەرى الەكسەي ني:
- ءبىز ءبارىن سارالاپ، تالداۋ جۇرگىزىپ وتىرامىز. ازياداعى اۋىراتلەت قىزداردىڭ سوڭعى جىلدارداعى كورسەتكىشتەرىن سارالاپ شىعىپ، جازيراعا 75 كەلى سالماقتا جۇلدەگە ىلىگۋ جەڭىلدەۋ بولادى دەپ ويلادىق. ويتكەنى ۇنەمى ازياداعى 69 كەلى سالماقتا باسەكەلەستىك شەكتەن تىس شيەلەنىستى بولىپ، 75 كەلىدە، كەرىسىنشە، جۇلدە الۋ وڭاي بولاتىن. سوندىقتان جازيرانى اۋىر سالماققا قويعان ەدىك. ءبىراق بۇل جولى ءبارى دە كەرىسىنشە بولىپ شىقتى. لوندون وليمپياداسىندا 69 كەلىدە چەمپيون اتانعان سولتۇستىك كورەيا قىزى يونگ-سيم ريم دە 75 كەلىگە اۋىسىپتى. ال ءبىز جازيرانىڭ ودان اسا المايتىنىن ءبىلىپ، ءوز سپورتشىمىزدى اۋىر سالماققا اۋىستىرعان ەدىك. بۇلاي بولاتىنىن كىم بىلگەن... ءارى جازيرانىڭ سالماعى سول كەزدە (وسىدان ءبىر اي بۇرىن) 74 كەلىگە جۋىقتاپ ەدى، ينچحونعا كەلگەن سوڭ، تاماقتارى ۇنامادى ما، قايتادان ءتۇسىپ كەتتى.
- يونگ-سيم ءريمنىڭ 75 كەلىگە اۋىسقانىن بىلگەن بەتتە، جازيرانى قايتادان 69 كەلىگە قويمادىڭىزدار ما؟
- ءبىز مۇنىڭ ءبارىن وسىدان ءبىر اي بۇرىن ويلاستىرىپ، ءوتىنىش بەرىپ قويعان ەدىك. ودان سوڭ ءبارى دە كەش بولدى.
- جازيرانىڭ بۇگىنگى كورسەتكىشتەرىنە قاراساق، ول ءوز سالماعىندا سىنعا تۇسكەندە، كۇمىس جۇلدەگە ىلىگە الادى ەكەن.
- كۇمىس دەگەنىڭىزدى بىلمەيمىن، ءبىراق جۇلدەگە ىلىگەرى انىق ەدى...
...ال جازيرا، بايىز تاۋىپ ءبىر جەردە تۇرا الماي، ارلى-بەرلى تەڭسەلىپ ءجۇر. كۇيىنىشىن باسا الار ەمەس. جانىنا جاقىنداپ، كۇيزەلگەن جان دۇنيەسىن ودان ءارى كۇيدىرگىمىز كەلمەدى.
ارتىنان باسقا باپكەرلەر ايتادى، بەكىتىلگەن ەرەجە بويىنشا جازيرانى ءبىر تاۋلىك قالعاندا باسقا سالماققا (ياعني ءوز سالماعىنا) اۋىستىرۋعا بولادى ەكەن...
ءبىز وسى، كەيدە باس باپكەر الەكسەي ءنيدى «تاماشا تاكتيك» دەپ، ماقتاپ جاتامىز. ءبىراق ونىڭ سول تاكتيكالىق ىشكى ەسەپتەرىنەن بۇگىن وپىق جەپ قالعاندايمىز. ەڭ وكىنىشتىسى، 21 گە تولماعان جاس قىزىمىز جازىقسىز جۇلدەسىز قالدى...
