ۋكراينا مۇحتار ءابليازوۆ ءىسى بويىنشا رەسەيگە كومەكتەسۋدەن باس تارتتى
بۇل تۋرالى كيەۆتەگى باسپا ءسوز ءماسليحاتىندا ۋكراينا پرەزيدەنتى پەتر پوروشەنكو ءمالىم ەتتى. قازىر فرانسيا تۇرمەسىندە وتىرعان مۇحتار ءابليازوۆ رەسەيگە نەمەسە ۋكرايناعا ەكستراديتسيالانۋى مۇمكىن.
باسپا ءسوز ءماسليحاتى كەزىندە ءبىر ءتىلشى مىنانداي ساۋال قويدى: «فرانسيادا ءابليازوۆ ءىسى بويىنشا بولىپ جاتقان سوتتا ۋكراينا باسقىنشى مەملەكەت - رەسەيمەن ارىپتەستىك جاساي الا ما؟»
ءوز كەزەگىندە پوروشەنكو رەسەيمەن ەشقانداي ارىپتەستىك بولمايتىنىن كەسىپ ايتتى. «ۋكراينانىڭ باس پروكۋراتۋراسى جالعىز نارسەنى، ياعني ۋكراينا تەرريتورياسىندا ۋكراين زاڭناماسىن بۇزعان قىلمىستى، ۋكرايناعا، ياعني مەملەكەتكە، سونىمەن قاتار جەكەلەي ازاماتتارعا، جەكە جانە زاڭدى تۇلعالارعا كەلتىرىلگەن شىعىنداردى عانا نەگىزگە الادى. تاعى دا ەرەكشە ايتا كەتەيىن، بۇل ماسەلەدە رەسەيمەن قانداي دا ءبىر ارىپتەستىك بولمايدى»، - دەپ جاۋاپ بەردى پوروشەنكو.
ەسكە سالا كەتەلىك، مۇحتار ءابليازوۆقا قازاقستان، سونىمەن قاتار رەسەي مەن ۋكراينا دا ىزدەۋ جاريالاعان. وعان التى ميللياردتان استام دوللاردى جىمقىردى دەگەن ايىپ تاعىلىپ وتىر. 2013-جىلدىڭ شىلدەسىندە بۇرىنعى بانكير فرانسيادا قۇرىقتالدى. ءبىرىنشى ينستانتسياداعى سوت مۇحتار ءابليازوۆتى رەسەيگە وتكىزىپ بەرمەكشى بولعان، الايدا ەكستراديتسيالاۋ ءىسى العاشقى سوت پروتسەسىندە زاڭ بۇزۋشىلىقتاردىڭ انىقتالۋىنا بايلانىستى قايتادان قاراۋعا جىبەرىلگەن.
