فۋتبول: الەم قۇراماسى - الماتىدا - فوتو

الماتى. قازاقپارات- فۋتبولدان الەم قۇراماسىنىڭ ويىنشىلارى تۇنگى رەيسپەن الماتىعا ۇشىپ كەلدى.

 لۋيش فيگۋ، فابيو كانناۆارو، پاولو مالديني، الەسساندرو نەستا، اندرەي شيەۆچەنكو، حاۆەر سانەتتي، كلارەنس زەەدورف، ەدگار داۆيدس، يەنس لەمانن، فرانچەسكو تولدو، دۋايت يورك، سەرجينو، كريستيان ۆەري، كريستيان پانۋچچي، سەرجينو جانە باسقا دا ويىنشىلاردى اۋەجايدا فۋتبول جانكۇيەرلەرى زور قۋانىشپەن قارسى الدى،

دەپ حابارلايدى «قايرات» فۋتبول كلۋبىنىڭ باسپا ءسوز قىزمەتىنەن.

كەيبىر جانكۇيەرلەر وزدەرىنىڭ ءپىر تۇتاتىن فۋتبولشىلارىمەن سۋرەتكە ءتۇسىپ تە ۇلگەردى. ءتىپتى ولاردى قوناق ۇيگە دەيىن شىعارىپ سالعاندار دا بولدى.

ەستەرىڭىزگە سالا كەتەلىك، بۇگىن الماتى قالاسىنىڭ ورتالىق ستاديونىندا «قايرات» فۋتبول كلۋبىنىڭ اتى اڭىزعا اينالعان ويىنشىلارىمەن الەم قۇراما كومانداسى اراسىندا قايىرىمدىلىق جولداستىق كەزدەسۋ وتەدى. بۇل «جۇلدىزدار ماتچى» «قايرات» فۋتبول كلۋبىنىڭ قۇرىلعانىنا 60 -جىل تولۋىنا ارنالادى.

ويىن كەشكى ساعات 20:00 دە باستالادى. ال ونىڭ الدىندا ساعات 19:00 دە ماتچ الدىندا كونسەرتتىك شوۋ بولادى.

سونىمەن قاتار، بۇگىن 17:00دە كوماندالاردىڭ باس جاتتىقتىرۋشىلارى مەن ويىنشىلارىنىڭ قاتىسۋىمەن باسپا ءسوز ءماسليحاتى وتەدى.

بيلەتتەر ءالى ساتىلىمدا بار جانە ولاردى تەك ورتالىق ستاديوننىڭ كاسسالارىنان عانا الۋعا بولادى.

بيلەتتەر  40  مىڭ تەڭگەدەن باستاپ  3 مىڭ تەڭگە ارالىعىندا ساتىلادى.

اۆتور: جاپپاربەرگەن ايبوتا