پولكوۆنيك قازاق ازاماتى گراناتانى دەنەسىمەن جاۋىپ، رەسەيلىك ساربازداردى امان الىپ قالدى

استانا. قازاقپارات - رەسەيدىڭ اسكەري پوليگونىندا قازاق پولكوۆنيگى گراناتانى دەنەسىمەن جاۋىپ، قاسىندا بولعان ساربازداردى قۇتقارىپ قالدى. ەڭ عاجابى، ونى ءوزى جارىلىستان امان قالعان، دەپ جازادى «ەكسپرەسس- ك» باسىلىمى.

سۆەردلوۆسك وبلىسىنىڭ لەسنوە قالاسىندا ىشكى اسكەردىڭ 3275 اسكەري بولىمىندەگى وقۋ-جاتتىعۋلار كەزىندە كىشى سەرجانت تەلەنين قولىنداعى ر گ د-5 گراناتاسىن ءتۇسىرىپ العان. سول جەردە بولعان ءبولىم كومانديرى، پولكوۆنيك سەرىك سۇلتانعابيەۆ ويلانباستان گراناتانى دەنەسىمەن باسىپ قالادى. سونىڭ ارقاسىندا جارىلىستان ساربازداردىڭ ەشقايسىسى زارداپ شەكپەگەن، ءبىراق ولاردىڭ قۇتقارۋشىسى، كوماندير اۋىر جارالانادى.

پولكوۆنيك سۇلتانعابيەۆ جەدەل جان ساقتاۋ بولىمىنە جەتكىزىلىپ، وعان ەكاتەرينبۋرگتەن ارنايى تىكۇشاقپەن كەلگەن رەسەي ءى ءى م ىشكى اسكەرى، 5- اسكەري گوسپيتالى دارىگەرلەرىنىڭ رەانيماتسيالىق بريگاداسى وتا جاساپ، پولكوۆنيكتى امان الىپ قالادى. باسىلىمنىڭ جازۋىنشا، ماماندار سۇلتانعابيەۆتىڭ ومىرىنە قاۋىپ جوق ەكەنىن ايتتى.