استانادا قۇربان شالاتىن ورىندار بەلگىلەندى
«قۇربان ايت - بارشا مۇسىلمان ءۇشىن ۇلىق مەرەكە. بيىل ول 4-قازانعا تۇسپا-تۇس كەلىپ تۇر. ايت نامازى استانا ۋاقىتى بويىنشا تاڭعى ساعات 8.00-دە باستالادى. قۇرباندىق شالۋ ناماز وقىلعاننان كەيىن عانا جۇزەگە اسىرىلۋى كەرەك. ويتكەنى وعان دەيىن سويىلعان مال ءوز قاجەتتىلىگىمىزدى وتەگەنمەن تەڭ. ال، قاساپشىلار الدىمەن تىركەۋگە تۇرۋى كەرەك.
بيىل قاساپشىلاردىڭ ءوزى مەديتسينالىق انىقتاماسىمەن مەشىتكە كەلىپ الدىن-الا تىركەلەدى. ولارعا مەشىتتە ارنايى سەمينارلار وتكىزىلەدى. ءبىز شاريعاتتا قالاي قۇرباندىق شالۋ كەرەكتىگىن ۇيرەتەمىز»، - دەيدى «نۇر استانا» ورتالىق مەشىتىنىڭ باس يمامى ناۋرىزباي قاجى وتپەنوۆ».
بۇگىندە قۇرباندىق شالۋ ورىندارى بەكىتىلگەن. قازىر قالا بازارلارى مەن شارۋا قوجالىقتارىندا ارنايى ورىندار دايىندالۋدا. ول استاناداعى «كەك» بازارى، «پيشەكومبينات استانالىق» ج ش س، «شاۋشەن»، «تەمەش» شارۋا قوجالىقتارى مەن «التىن تاعا» مال بازارى. بيىلعى جىلدىڭ تاعى ءبىر ەرەكشەلىگى، «راببىڭ ءۇشىن قۇرباندىق شال» قايىرىمدىلىق اكسياسىنا قاتىسىپ، بىرنەشە كىسىمەن بىرىگىپ قۇربان شالۋعا بولادى.
«راببىڭ ءۇشىن قۇرباندىق شال» اكسياسىن وتكىزىپ جاتىرمىز. كىسىلەر جينالىپ، ءبىر قارا مالدى جەتى ادام بىرىگىپ قۇرباندىققا شالا الادى. بولماسا جەكە كىسى قوي، نەمەسە ەشكىسىن قۇرباندىققا شالۋىنا بولادى. اكسيانىڭ ماقساتى جەتىم-جەسىرلەرگە، جاعدايى ناشار كىسىلەرگە ەت تاراتۋ»، - دەيدى «نۇر استانا» ورتالىق مەشىتىنىڭ باس يمامى.
ال، ەلورداداعى 8 مەشىت مەرەكە كۇندەرى جاماعاتتى قابىلداپ، قۇرباندىق ەتتەرىن مۇقتاج جاندارعا تاراتۋعا دايىن. بىلتىر 9 توننا ەت تاراتىلىپتى. قۇربان شالۋعا شاماسى كەلمەگەن كىسىلەر 8 مەشىتتىڭ قايسىسى ىڭعايلى بولسا، سوندا بارىپ، ايت نامازىنا قاتىسا الادى. جاماعاتپەن بىرگە تىلەگەن تىلەك قاشان دا قابىل بولادى.
ايتا كەتەيىك، قۇرباندىققا قوي، ەشكى، سيىر، تۇيە جارامدى. قۇرباندىق مالىنىڭ دەنى ساۋ، ەتتى جانە دەنە مۇشەلەرى كەم بولماۋى كەرەك. قۇربان شالعان كىسىلەر ەتتى تولىعىمەن ساداقاعا بەرۋى شارت ەمەس. ونىڭ ءبىر بولىگىن وتباسىمەن جەۋىنە، نە بولماسا، وزدەرى ەتكە مۇقتاج بولسا، تۇگەلدەي الىپ قالۋىنا بولادى.
