قازاقستاندا تەننيستى دامىتۋ تۇرعىسىنان ۇلكەن جۇمىس اتقارىلىپ جاتىر - ن. نازاربايەۆ - فوتو
مەملەكەت باسشىسى جارىس الدىندا ايگىلى تەننيسشىلەردى قابىلداپ، كەزدەسۋ بارىسىندا ولاردىڭ وسى كەلىسى ەلىمىزدەگى تەننيستىڭ بۇدان ءارى دامۋى ءۇشىن ماڭىزدى ەكەندىگىنە توقتالدى.
- بۇل قازاقستاندىق جاس سپورتشىلار ءۇشىن ۇلكەن وقيعا. سىزدەر ولارعا وزدەرىڭىزبەن ويناۋ مۇمكىندىگىن بەردىڭىزدەر. بۇل ولاردى ايتارلىقتاي ىنتالاندىرۋ بولىپ سانالادى. سونداي-اق سىزدەر ءبىزدىڭ ەلىمىزگە كەلىپ، ەلوردانىڭ ايتۋلى نىساندارىن ارالاپ كورۋ مۇمكىندىگىنە يە بولدىڭىزدار، - دەدى قازاقستان پرەزيدەنتى.
نۇرسۇلتان نازاربايەۆ بۇرىن تەننيس ءداستۇرى بولماعان ءبىزدىڭ ەلىمىزدە قازىر سپورتتىڭ وسى ءتۇرىن دامىتۋ تۇرعىسىنان ۇلكەن جۇمىس اتقارىلىپ جاتقاندىعىنا توقتالدى.
- مىسالى، مەنىڭ ءوزىم تەننيستى 40 تان اسقاسىن ويناي باستادىم. بۇگىندە بۇكىل ەلىمىزدە، وڭىرلەردە تەننيس ورتالىقتارى سالىنىپ، ونى تانىمال ەتۋ جۇمىستارى جۇرگىزىلۋدە، - دەدى مەملەكەت باسشىسى.
ءوز كەزەگىندە تەننيسشىلەر ەلىمىزگە كەلۋگە شاقىرعانى ءۇشىن العىس ايتا وتىرىپ، قازاقستانعا كەلۋ ولار ءۇشىن ۇلكەن قۇرمەت ەكەنىن اتاپ ءوتتى.
كەزدەسۋدىڭ سوڭىندا ر. نادال ءوزىنىڭ راكەتكاسىن ەلباسىنا تارتۋ ەتتى.
رافاەل نادال مەن جو-ۆيلفريد تسونگا ەلىمىزگە ساپارى اياسىندا قازاقستاندىق جاس تەننيسشىلەرگە - «Team Kazakhstan» اكادەمياسىنىڭ تالىمگەرلەرىنە شەبەرلىك ءدارىسىن وتكىزدى جانە استانانىڭ كورىكتى جەرلەرىن ارالاپ كوردى.
رافاەل نادال - يسپاندىق تەننيسشى، ۇلكەن دۋلىعا ءتۋرنيرىنىڭ 14 دۇركىن جەڭىمپازى، 2008-جىلعى وليمپيادانىڭ جەكە سىنداعى چەمپيونى، «التىن دۋلىعا»، سونداي-اق دەۆيس كۋبوگىنىڭ ءۇش رەت يسپانيا قۇراماسى ساپىنداعى يەگەرى.
جو-ۆيلفريد تسونگا - كاسىپقوي فرانسۋز تەننيسشىسى، ATP 15 ءتۋرنيرىنىڭ جەڭىمپازى، 2012-جىلعى وليمپيادا ويىندارىنىڭ ەرلەر اراسىنداعى جۇپتىق سىنداعى كۇمىس جۇلدەگەرى، 2014-جىلعى حوپمان كۋبوگىنىڭ فرانسيا ۇلتتىق قۇراماسى ساپىنداعى يەگەرى.
