20:14, 25 - قىركۇيەك 2014 | GMT +5
عالىمدار كۇن قۋاتىن ساقتاۋدىڭ تىڭ ءادىسىن ويلاپ تاپتى
استانا. قازاقپارات - يزرايلدىك عالىمدار وزدەرىنىڭ تىڭ جاڭالىعىن الەم نازارىنا ۇسىندى. ولار جيناقتالعان كۇن قۋاتىن ساقتاۋدىڭ ءادىسىن ويلاپ تاۋىپتى. «ەندى سول ارقىلى قازىرگى ەنەرگەتيكا سالاسىنىڭ ەڭ وزەكتى ماسەلەسى شەشىمىن تاپپاق»، - دەيدى ولار.
ءبىر قىزىعى، ءادىستى ىسكە اسىرۋ كەزىندە كۇن باتارەيالارى قولدانىلمايدى. كۇننەن تاراعان ساۋلە ارنايى پارابولالىق اينالاردىڭ بەتىنە شاعىلىسىپ، تۇسكەن جەرىندە اسا جوعارى تەمپەراتۋرا پايدا بولادى. اتالعان اينا قاباتىنا كىرىكتىرىلگەن ەرەكشە ماتەريالدىڭ بويىنا الدىن الا قۇيىلعان سۇيىقتىق قايناپ، ونىڭ بۋى قۋات كوزىن قاجەت ەتەتىن كەز-كەلگەن قوندىرعىنى قوزعالىسقا كەلتىرەدى. ال، وندىرىلگەن قۋات كوزىن پارابولالىق اينالارعا جالعانعان جەراستى قويمالارىندا ساقتاۋعا بولادى. ءسويتىپ، «ەندى كۇن قۋاتىن تەك جارىق كەزدە عانا ەمەس، وزىمىزگە قاجەتتى كەز-كەلگەن ۋاقىتتا پايدالاناتىن بولامىز»، - دەيدى ونەرتاپقىشتار.
Baq.kz
