قازاقستاندا «بويداق» دەپ اتالاتىن سەريال تۇسىرىلەدى
بۇل كومەديالىق كارتينا قادىربەك اتتى 43 جاستاعى بويداق تۋرالى. جىگىتتىڭ جاس كەزىندە ءوزى ۇيلەنگەلى جۇرگەن قىزىن وزگە جىگىت الىپ قاشىپ كەتكەندىكتەن ول پسيحولوگيالىق جاعىنان قاتتى كۇيزەلىسكە تۇسەدى. وسى وقيعادان كەيىن قادىربەك مۇلدە ۇيلەنبەۋگە، ءومىرىن تەك جۇمىس ىستەۋگە ارناماقشى بولادى. الايدا ۋاقىت وتە كەلە ونىڭ ءومىرى وزگەرەدى.
كارتينانىڭ سيۋجەتى بويىنشا 20 جىل وتكەننەن كەيىن باس كەيىپكەر ءوزىنىڭ تۋعان كۇنىندە موپەدىن ءمىنىپ جۇمىسقا كەلەدى. كولىك تۇراعىندا ونىڭ موپەدىن ۇلكەن جۇك كولىگى تاپتاپ كەتەدى. كەلەڭسىز جاعدايلار مۇنىمەن دە بىتپەيدى. قادىربەك جۇمىسقا كەلگەندە ءوزىنىڭ ۇزاق جىلدار تالپىنعان باسشىلىق قىزمەتىنەن ايىرىلعانىن بىلەدى. ونىمەن قويماي ديرەكتورلىق قىزمەتكە قادىربەكتىڭ موپەدىن تاپتاپ كەتكەن قىز تاعايىندالادى. كەيىننەن قادىربەك ءوزىنىڭ بويداقتىعىنىڭ كەسىرىنەن باسشىلىق قىزمەتكە قابىلدانباعانىن بىلەدى. وسىدان كەيىن ول ءوزىنىڭ ءومىرى تۋرالى ويلانا كەلىپ، وتباسىن قۇرۋعا بەل بايلايدى.
«بويداق» سەريالىندا ون سەريا بويى قادىربەكتىڭ باسىنان نەبىر قىزىق جاعدايلار وتەدى. وعان قىلىقتارى ەرسى قىزدار دا كەزدەسەدى، باستىعىنان ۇرىس تا ەستيدى، قىم-قۋىت شپيوندىق وقيعالاردىڭ دا كۋاسى بولادى، ايتەۋىر سوڭىندا ول ءوزىنىڭ باقىتىن تابادى. «بويداق» كومەديالىق فيلمىندە باستى رولدەردە قازاقستاننىڭ ەڭبەك سىڭىرگەن مادەنيەت قايراتكەرى، «نىسانا» تەاترىنىڭ اكتەرى ءابۋناسىر سەرىكوۆ، قازاقستاننىڭ ەڭبەك سىڭىرگەن ءارتىسى ءاليحان ىدىرىشوۆا، بەلگىلى بالەت ءبيشىسى ساۋلە راحمەدوۆا وينايدى.
كەيىنگى كەزدە بەلگىلى بالەرينا ساۋلە راحمەدوۆا فيلمدەرگە ءجيى ءتۇسىپ ءجۇر. دەگەنمەن بۇل جولى ول ءبىرىنشى رەت كومەديالىق فيلمدە ءرول ويناماق. «مەن فيلمدە باس كەيىپكەردىڭ باستىعىنىڭ رولىندە وينايمىن. باستىق رەتىندە مەن وعان كۇن بەرمەيمىن، اقىر سوڭىندا ەكەۋمىزدىڭ ارامىزدا رومانتيكالىق سەزىم پايدا بولادى. شىنىن ايتسام، مەن ءالى فيلمنىڭ سوڭى قالاي اياقتالاتىنىن بىلمەيمىن، ءبىراق ايتەۋىر سوڭى «حەپپي-ەند»- پەن بىتەتىنى انىق. ءابۋناسىر وتە مىقتى كومەديالىق اكتەر، سونداي-اق ول تەرەڭ، سالماقتى رولدەردى دە تاماشا وينايدى. ونىمەن جۇمىس ىستەۋدىڭ ءوزى عاجاپ»، - دەيدى ساۋلە راحمەدوۆا.
«بويداق» فيلمىنىڭ ءتۇسىرىلىمى بىرنەشە اپتاعا سوزىلادى. سەريالدىڭ العاشقى سەريالارىن كورەرمەندەر «حابار» ارناسىنان 2014-جىلدىڭ جەلتوقسان ايىنان باستاپ كورە الادى. سەريالدى تۇسىرۋشىلەردىڭ ايتۋىنشا، بۇل كارتينا «كۋحنيا»، «كلينيكا» سەريالدارى سەكىلدى كورەرمەنگە كوتەرىڭكى كوڭىل-كۇي سىيلايدى.
