قورعانىس ءمينيسترى قازا تاپقان ۇشقىشتاردىڭ تۋىستارى مەن جاقىندارىنا كوڭىل ايتتى
«قازاقستاننىڭ قارۋلى كۇشتەرىنىڭ اتىنان جانە ءوز اتىمنان قىزمەتتىك مىندەتتەرىن اتقارۋ ۇستىندە قازاعا ۇشىراعان قر قك اۋە قورعانىسى كۇشتەرىنىڭ ۇشقىشتارى پودپولكوۆنيك ەرلان ناۋانوۆ پەن پودپولكوۆنيك دەنيس گوربۋنوۆتىڭ تۋىستارى مەن جاقىندارىنا تەرەڭ قايعىرعان سەزىممەن كوڭىل ايتامىن جانە دەمەۋ سوزدەرىمدى بىلدىرەمىن. تالانتتى، باتىل جانە ناعىز كەمەل شاعىنداعى جاس وفيتسەرلەر دۇنيەدەن ءوتتى. بۇل ءبىزدىڭ ءبارىمىز ءۇشىن اۋىر قايعى. ولار اسكەري ءىستىڭ تانىلعان كاسىبيلەرى بولدى، ولاردى كەز كەلگەن جاعدايدا العا قويىلعان مىندەتتەردى ورىنداپ شىعاتىن ەرجۇرەك وفيتسەرلەر دەپ تانيتىن. بۇل قايعى بەيبىت كەزدە دە اسكەري ماماندىق رۋحى كۇشتى جانە ەرجۇرەك ادامداردىڭ ۇلەسى ەكەنىن تاعى دا ەسكە سالادى» ، - دەلىنگەن قر قورعانىس مينيسترلىگى تاراتقان ماتىندە.
ەسكە سالا كەتەيىك، اسكەري ۇشاق 2014 -جىلعى 23 قىركۇيەكتە تۇندە الماتى وبلىسىندا اپاتقا ۇشىرادى. اۆياتسيا وقيعاسىنىڭ سەبەپتەرىن انىقتاۋ ءۇشىن ارنايى كوميسسيا قۇرىلدى.
