ا ق ش ستۋدەنتتەرى ءال-فارابي اتىنداعى قازۇۋ-دى تاڭدادى
مۇنداي الماسۋ ءال-فارابي اتىنداعى قازۇۋ مەن امەريكاندىق حالىقارالىق ءبىلىم بەرۋ كەڭەسى (ACCELS، ا ق ش، ۆاشينگتون) اراسىندا ارىپتەستىك تۋرالى ەكىجاقتى كەلىسىمگە قول قويىلعاننان سوڭ جۇزەگە اسىپ وتىر.
«امەريكاندىق ستۋدەنتتەردىڭ ەۋروپالىق ج و و اراسىنان قازاقستاندىق وقۋ ورنىن تاڭداۋى وتاندىق ءبىلىم بەرۋ جۇيەسىنىڭ دەڭگەيى جوعارى ەكەنىن كورسەتەدى. ءبىزدىڭ مامانداردىڭ ۇنەمى بىلىكتىلىكتەرىن ارتتىرىپ، بىلىمدەرىن جوعارىلاتۋىنىڭ ارقاسىندا، وزىق تەحنولوگيالاردى ەندىرۋ، حالىقارالىق مويىندالۋ جانە ءبىلىم بەرۋ باعدارلامالارىنىڭ جەتىستىكپەن اككرەديتاتسيادان ءوتۋى، ءبىزدىڭ ۋنيۆەرسيتەتتىڭ بەلسەندى اكادەميالىق ۇتقىرلىعى شەتەلدىك ءبىلىم الۋشىلاردىڭ قىزىعۋشىلىعىن تۋدىرۋدا»، - دەدى وقۋ ورنىنىڭ باسپا ءسوز حاتشىسى ەڭلىك اقجىگىت.
مامانداردىڭ پىكىرىنشە، جاڭا جوبا ستۋدەنتتەرمەن اكادەميالىق الماسۋ، عىلىمي-زەرتتەۋ تاجىريبەلەرى جانە سىناق مەرزىمىنەن ءوتۋ، بىرلەسكەن جوبالار مەن گرانتتىق زەرتتەۋلەرگە قاتىسۋ، ەڭ ۇزدىك عىلىمي جۋرنالداردا جانە وزگە دە باسقا باسىلىمداردا ناتيجەلەردى جاريالاۋ باعىتىندا ۇلكەن مۇمكىندىكتەر اشادى.
«ا ق ش-تان كەلگەن ستۋدەنتتەر بىزگە ءتىل مەڭگەرۋگە كەلىپ وتىر. قازۇۋ وقىتۋشىلارى ورىس ءتىلىن وقىتۋدىڭ كەشەندى باعدارلاماسى بويىنشا جۇمىس ىستەۋگە دايىن. ول وزىندىك ەرەكشە وقۋ باعدارلاماسىن قاراستىرادى: ۇلكەن كولەمدەگى توپتىڭ ورتاق پاندەردەن بولەك، جەكە ساباقتار دا جۇرگىزىلەدى، بىلىمدىلىك، مادەنيەتتىلىك، ىنتالاندىرۋ ادىستەرى قولدانىلاتىن بولادى. جالپى، توپتىق ساباقتاردان باسقا جەكە ساباق تا جۇرگىزىلەدى. امەريكاندىق ستۋدەنتتەر قازاق ءتىلى مەن قازاق مادەنيەت مەڭگەرۋگە ۇلكەن قۇلشىنىس تانىتىپ وتىر»، - دەيدى شەتەل فيلولوگياسى جانە جالپى ءتىل ءبىلىمى كافەدراسىنىڭ پروفەسسورى ەلەونورا سۇلەيمەنوۆا.
اۆتور: گۇلميرا ءعوسمانالي
