قازاقستان ساۋد ارابياسىنىڭ ەكونوميكالىق فورۋم شاقىرۋ تۋرالى باستاماسىن قولدايدى - فوتو
ءماجىلىس ءتوراعاسى دەلەگاتسيا مۇشەلەرىن ەكى كۇن بۇرىن وتكەن ماڭىزدى مەرەكە - ساۋد ارابياسى كورولدىگىنىڭ جاريالانعان كۇنىمەن جانە كونسۋلتاتيۆتىك كەڭەستىڭ 90 جىلدىعىمەن قۇتتىقتادى. وسى رەتتە قابيبوللا جاقىپوۆ قازاقستان ساۋد ارابياسىمەن بارلىق سالادا ەكىجاقتى ىنتىماقتاستىقتى دامىتۋعا ايرىقشا ماڭىز بەرەتىنىن اتاپ ءوتتى.
ساۋدا-ەكونوميكالىق ىقپالداستىق ماسەلەلەرىن ءسوز ەتكەندە ءماجىلىس سپيكەرى جوسپارلانىپ وتىرعان قازاقستان-تۇركىمەنستان-يران-پارسى شىعاناعى تەمىر جولىنىڭ ىسكە قوسىلۋى قوس ەلدىڭ تاۋار اينالىمىن نىعايتا تۇسەتىنىنە سەنىم ءبىلدىردى.
سونىمەن قاتار ءماجىلىس ءتوراعاسى مەيمانعا ءبىزدىڭ ەلىمىزدىڭ الەمدىك جانە ءداستۇرلى دىندەر سەزدەرى، ب ۇ ۇ قاۋىپسىزدىك كەڭەسىنىڭ تۇراقتى ەمەس مۇشەلىگى، ەكسپو-2017 كورمەسى سىندى باسقا دا ماڭىزدى حالىقارالىق باستامالارىنا، سونداي-اق الەۋمەتتىك ماڭىزدى نىساندار قۇرىلىسىنا كورسەتىپ جاتقان قولداۋى ءۇشىن ءوز ريزاشىلىعىن ءبىلدىردى. ءارى ول قازاقستاننىڭ ازەربايجان، ورتالىق ازيا ەلدەرى جانە اراب مەملەكەتتەرى ەكونوميكالىق فورۋمىن شاقىرۋ تۋرالى ساۋد ارابياسىنىڭ باستاماسىن قولدايتىندىعىن جەتكىزدى.
ەلىمىز تاۋەلسىزدىگىن العان كۇننەن باستاپ قازاقستانعا كوبىرەك ات باسىن بۇرعان مەيمانداردىڭ ءبىرى ابداللا ءال اش-شەيح قازاقستاننىڭ كولەڭكەدە قالىپ قويماي، بۇكىل الەم الدىندا ءوزىن مويىنداتقانىن ايتا كەلىپ، الداعى ۋاقىتتا دا ەكى ەلدىڭ ءتيىمدى ىنتىماقتاستىقتى جالعاستىرۋىنىڭ مۇمكىندىگى زور ەكەنىن تىلگە تيەك ەتتى.
